Macron: Franca po punon për të rifilluar dialogun me presidentin rus
“Mendoj se do të ishte e dobishme, por nuk mendoj se Rusia është aktualisht e gatshme të përfundojë një marrëveshje paqeje (me Ukrainën) në ditët apo javët e ardhshme”, thotë presidenti francez.
Presidenti francez Emmanuel Macron tha të martën se po bëhen përgatitje për të rifilluar dialogun me presidentin rus Vladimir Putin, duke vënë në dukje megjithatë se Moska nuk po tregon një “vullnet të vërtetë” për të negociuar paqen me Ukrainën.
“Po përgatitet dhe, për këtë arsye, po zhvillohen diskutime në nivel teknik”, u tha Macron gazetarëve gjatë një vizite në verilindje të Francës, raportoi e përditshmja franceze Le Monde.
“Mendoj se do të ishte e dobishme, por nuk mendoj se Rusia është aktualisht e gatshme të përfundojë një marrëveshje paqeje (me Ukrainën) në ditët apo javët e ardhshme”, shtoi ai.
Sipas Macron, kontakti me Kremlinin është i nevojshëm për të negociuar garancitë e sigurisë pas luftës.
“Në këtë kontekst, është e rëndësishme që evropianët të rikthejnë kanalet e tyre të diskutimit”, u citua ai nga e përditshmja franceze.
Macron theksoi se Franca do të vazhdojë të mbështesë Ukrainën, duke thënë se sulmet ruse ndaj infrastrukturës energjetike të Ukrainës janë “të patolerueshme” dhe nuk tregojnë një “gatishmëri të sinqertë” për të negociuar paqen.