Ministri i Energjisë i Katarit paralajmëroi të premten se eksportet e energjisë nga vendet e Gjirit mund të ndalen nëse lufta që po zhvillohet në rajon vazhdon për disa javë, duke theksuar se sulmet e zgjatura mund të shkaktojnë ndërprerje serioze në tregjet globale.

Në deklarata të cituara nga Qatar News Agency, nga një intervistë për Financial Times, Saad al-Kaabi tha se vazhdimi i luftimeve mund ta çojë çmimin e naftës në 150 dollarë për fuçi dhe çmimin e gazit në 40 dollarë për milion njësi termale.

“Kushdo që ende nuk ka shpallur forcë madhore pritet ta bëjë këtë brenda ditëve të ardhshme nëse situata vazhdon”, tha ministri, duke shtuar se “të gjithë eksportuesit në rajonin e Gjirit do të duhet të aktivizojnë forcën madhore”.

Ai paralajmëroi se nëse lufta zgjat për disa javë, rritja ekonomike globale mund të preket.

“Çmimet e energjisë do të rriten për të gjithë, do të ketë mungesë të disa produkteve dhe do të krijohet një zinxhir reagimesh negative për fabrikat që nuk do të jenë në gjendje të sigurojnë furnizime”, tha al-Kaabi.

Ai shtoi se edhe nëse lufta përfundon menjëherë, Katarit do t’i duhen “javë deri në muaj” për të rikthyer ciklet normale të furnizimit me energji.

Al-Kaabi paralajmëroi gjithashtu se ndërprerjet e zgjatura mund të ndikojnë ndjeshëm në tregjet globale të energjisë dhe madje mund të çojnë në “kolapsin e ekonomive botërore”.

Më herët të mërkurën, kompania shtetërore e energjisë QatarEnergy njoftoi se kishte informuar klientët për shpalljen e forcës madhore, pas pezullimit të prodhimit për shkak të luftës mes ShBA-së dhe Izraelit nga njëra anë dhe Iranit nga ana tjetër.

Forca madhore është një klauzolë ligjore në kontrata që u lejon furnizuesve të pezullojnë detyrimet kontraktuale, siç është dorëzimi i ngarkesave, pa u përballur me penalitete në rrethana të jashtëzakonshme.

Konflikti tashmë ka ndërprerë furnizimet me energji, ndërsa trafiku detar përmes Ngushticës së Hormuzit ka rënë ndjeshëm. Rreth 20 milionë fuçi naftë kalojnë zakonisht çdo ditë përmes kësaj ngushtice, por raportimet tregojnë se qindra anije po presin aktualisht në të dy anët për shkak të rritjes së rreziqeve të sigurisë.

Që nga 28 shkurti, Izraeli dhe ShBA-ja kanë kryer operacione ushtarake kundër Iranit, duke lënë të vrarë qindra iranianë, përfshirë zyrtarë të lartë të sigurisë dhe Udhëheqësin Suprem të Iranit, Ali Khamenei.

Irani është kundërpërgjigjur duke lëshuar raketa dhe dronë drejt Izraelit dhe ndaj asaj që e quan “interesa amerikane”në vendet e Gjirit, Irak dhe Jordani. Disa nga këto sulme kanë shkaktuar viktima dhe dëme në objekte civile, duke nxitur reagime dhe dënime nga vendet arabe të prekura.