Presidenti i Türkiyes, Recep Tayyip Erdoğan ka theksuar rëndësinë e solidaritetit mes shteteve turkike dhe e ka cilësuar atë si një “domosdoshmëri strategjike”.

“Politika botërore po kalon një transformim të thellë. Në një kohë kur sistemi ndërkombëtar po përpiqet të vendosë drejtësinë dhe besimin ndërsa luftërat dhe krizat po prekin rajone të gjera gjeografike, solidariteti mes shteteve turkike është bërë një domosdoshmëri strategjike”, tha Erdoğan në një artikull të botuar në mediat kryesore të vendeve anëtare dhe vëzhguese të Organizatës së Shteteve Turkike (OTS), në prag të samitit të saj të 13-të.

Samiti në Ankara dhe kryesimi i ardhshëm i Türkiyes 

Erdoğan theksoi se uniteti mes shteteve turkike është “shprehja më e fuqishme” e trashëgimisë së kahershme të trashëguar nga historia e përbashkët. “Uniteti i botës turkike është shprehja më e fuqishme e trashëgimisë sonë të rrënjosur thellë, të trashëguar nga historia jonë e përbashkët si dhe e vendosmërisë sonë për të formësuar të ardhmen tonë të përbashkët”, tha Erdoğan.

Ai theksoi se lidhjet që bashkojnë popujt turkike në rajone dhe shekuj të ndryshëm tashmë përbëjnë themelet e bashkëpunimit politik, shoqëror, ekonomik dhe kulturor në kuadër të OTS-së.

Erdoğan theksoi se mobilizimi i potencialit të madh të botës turkike drejt synimeve të përbashkëta, forcimi i unitetit përmes arritjeve konkrete dhe lënia e një bote turkike më të fuqishme për brezat e ardhshëm përbëjnë përgjegjësi historike për të gjitha shtetet anëtare.

“Samitin e 13-të të Organizatës së Shteteve Turkike, të cilin do ta zhvillojmë në Ankara me temën ‘Shekulli Turk: Unitet në gjuhë, mendim dhe vepër’, e konsideroj si një takim të rëndësishëm që do ta forcojë më tej këtë vendosmëri të përbashkët”, theksoi më tej ai.

Ai shtoi se Türkiyes e konsideron marrjen e kryesimit të organizatës nga Azerbajxhani si një përgjegjësi historike për arritjen e objektivave të përbashkëta dhe rritjen e kapaciteteve institucionale të organizatës. Duke iu referuar deklaratave të turkologut të shquar Ismail Gasprinski mbi rëndësinë e unitetit, Erdoğan tha se vizioni i tij vazhdon të frymëzojë aktivitetet e organizatës.

Ai theksoi se organizata, e themeluar mbi themelet e hedhura në Nakhchivan, po fiton gjithnjë e më shumë ndikim falë trashëgimisë së saj të përbashkët historike dhe kulturore.

“Shtetet turkike, të bashkuara rreth një vullneti të përbashkët, kanë fuqinë për të kapërcyer sfidat më të vështira dhe për të përcaktuar të ardhmen e tyre. Themeli i unitetit në botën turkike është respektimi i sovranitetit, pavarësisë dhe vullnetit kombëtar të secilit vend vëllazëror. Ky unitet do të ndërtohet jo vetëm mbi vlerat e përbashkëta, por edhe mbi besimin e ndërsjellë dhe interesat e përbashkëta”, shtoi ai.

Integrimi ekonomik i botës turkike ndër prioritetet kryesore

Duke folur për integrimin ekonomik, Erdoğan theksoi mundësitë që ofron Korridori i Mesëm Trans-Kaspik Lindje-Perëndim.

“Integrimi ekonomik i botës turkike është ndër prioritetet kryesore që organizata jonë duhet t’i trajtojë me kujdes në periudhën e ardhshme. Korridori i Mesëm Trans-Kaspik Lindje-Perëndim ofron mundësi historike në këtë drejtim. Në një kohë kur tregtia mes Azisë dhe Evropës po riformësohet, hapësira gjeografike turkike ka potencialin të bëhet një nga qendrat kryesore të rrjeteve globale të transportit dhe logjistikës”, tha ai.

Erdoğan tha se rrjetet hekurudhore, portet, lidhjet rrugore dhe sistemet doganore po zhvillohen si elemente plotësuese të njëra-tjetrës. Ai theksoi se çdo investim që lidh dy brigjet e Detit Kaspik do të rrisë tregtinë mes vendeve vëllazërore dhe do të kontribuojë në mirëqenien e përbashkët.

Ai po ashtu tha se Türkiye dhe shtetet e tjera turkike do ta shfrytëzojnë më me efektivitet Fondin e Investimeve Turkike, do të eliminojnë pengesat në tregtinë mes vendeve anëtare, do të forcojnë kapacitetet e tyre prodhuese dhe investuese, do t’i shfrytëzojnë më mirë burimet energjetike dhe potencialin e energjisë së rinovueshme, do të përmirësojnë infrastrukturën e komunikimit dhe do të zgjerojnë bashkëpunimin në prodhim, tregti dhe teknologji.

- “Themeli më i çmuar i unitetit tonë është vetëdija jonë e përbashkët qytetëruese”

Më tej, Erdoğan deklaroi se solidariteti i krijuar në fushën ekonomike do të ruhet edhe në bashkëpunimin në fushën e sigurisë. Ai tha se shtetet anëtare do të forcojnë aftësinë për të vepruar së bashku kundër terrorizmit, krimit ndërkufitar, kërcënimeve kibernetike dhe fatkeqësive natyrore, duke bashkuar burimet e tyre.

Ai theksoi bashkëpunimin në industrinë e mbrojtjes, duke veçuar rëndësinë e shkëmbimit të përvojave, zhvillimit të teknologjive vendore dhe kombëtare si dhe rritjes së kapaciteteve të prodhimit të përbashkët.

“Themeli më i çmuar i unitetit tonë është vetëdija jonë e përbashkët qytetëruese. Urtësia e Khoja Ahmed Yasawit, fjalët e Ali-Shir Nava’it, dituria e Nizami Ganjavit, vargjet e Magtymguly Pyragyt, gjuha e zemrës së Yunus Emres dhe shkrimet e Chinghiz Aitmatovit janë të gjitha piketa që ndriçojnë të ardhmen e pasurisë së një qytetërimi të madh, i cili kapërcen kufijtë gjeografikë”, u shpreh ai.

Erdoğan e cilësoi konsensusin e arritur për një alfabet të përbashkët turkik si një hap historik drejt afrimit më të madh kulturor. Ai tha se bashkëpunimi në arsim, shkencë, botime dhe teknologji digjitale do ta çojë më tej këtë nismë. Ai theksoi rëndësinë e nxitjes së të rinjve për të studiuar në vendet e tjera turke, afrimit të universiteteve dhe shkencëtarëve si dhe sigurimit që gjuhët turke të zënë vendin që u takon në epokën e inteligjencës artificiale.

Vazhdojmë solidaritetin tonë me popullin qipriot turk

Në artikullin e tij, Erdoğan gjithashtu e trajtoi mbrojtjen e të drejtave të popullit qipriot turk dhe forcimin e marrëdhënieve të tij me OTS-në.

“Përgjegjësia jonë, e trashëguar nga ky qytetërim me rrënjë të thella, është ta mbrojmë vëllazërinë tonë në të gjitha rrethanat dhe të ruajmë të drejtat dhe interesat e njëri-tjetrit. Në përputhje me këtë bindje, ne vazhdojmë solidaritetin tonë me popullin qipriot turk, i cili është pjesë e pandashme e botës turkike”, theksoi ai.

Erdoğan po ashtu theksoi rëndësinë e zgjerimit të mundësive që ofron statusi i Republikës Turke të Qipros Veriore (RTQV) si vëzhguese në organizatë, si dhe të forcimit të lidhjeve të saj me shtetet e tjera turklike.

Ai shtoi se Türkiye do të vazhdojë të mbajë qëndrimin e saj të vendosur për t’i dhënë fund asaj që e cilëson si izolim të padrejtë të imponuar ndaj qipriotëve turq si dhe për njohjen e barazisë së tyre sovrane dhe të statusit të barabartë ndërkombëtar.

Sipas tij, forcimi i OTS-së do të kontribuojë në paqen dhe besimin e ndërsjellë në të gjithë rajonin si dhe do të mbështesë stabilitetin rajonal dhe global. Presidenti turk theksoi se përgjegjësia kryesore e organizatës është shndërrimi i vullnetit të përbashkët politik në arritje të qëndrueshme në fushat ekonomike, politike, kulturore dhe teknologjike.

Në përfundim të artikullit të tij, Erdoğan shprehu besimin në të ardhmen e bashkëpunimit ndërmjet kombeve turkike.

“Besoj sinqerisht se shekulli 21 do të jetë ‘Shekulli i Botës Turke’. Samiti i Ankarasë do të hapë horizonte të reja drejt këtij synimi, do të rrisë ndikimin ndërkombëtar të organizatës sonë dhe do të forcojë më tej solidaritetin ndërmjet vendeve tona vëllazërore. Përgjegjësia jonë më e madhe është ta kurorëzojmë me arritje të qëndrueshme idealin e unitetit, të cilin e kemi mbajtur gjallë në zemrat tona prej shekujsh dhe t’u lëmë brezave të ardhshëm një botë turke më të fortë në çdo aspekt”, u shpreh Erdoğan.