Sekretari i Përgjithshëm i Organizatës Ndërkombëtare të Kulturës Turke (TURKSOY), Sultan Raev, tha se synojnë t'i promovojnë vendet turke, botën turke dhe kulturën turke në Maqedoninë e Veriut.

Raev, në kuadër të kontakteve të tij në Shkup, u takua me ministrin e Kulturës dhe të Turizmit të Maqedonisë së Veriut, Zoran Lutkov.

Pas takimit, duke folur për gazetarët, Raev tha se ndodhen në vend me ftesë zyrtare të Qeverisë së Maqedonisë së Veriut dhe se në muajin mars është nënshkruar një protokoll bashkëpunimi ndërmjet TURKSOY-it dhe Ministrisë së Kulturës dhe të Turizmit të Maqedonisë së Veriut.

"Shpresojmë që në Maqedoninë e Veriut të kemi shumë plane dhe programe për t'i promovuar të gjitha vendet turke, botën turke dhe kulturën turke", tha Raev.

Duke e tërhequr vëmendjen se në kuadër të protokollit të bashkëpunimit të nënshkruar kanë disa projekte, Raev theksoi se do të ofrojnë mbështetje që turqit në Maqedoninë e Veriut ta promovojnë kulturën, gjuhën dhe traditat e tyre.

Raev bëri të ditur se do të mbështesin edhe Teatrin Turk në Maqedoninë e Veriut ndërsa në kuadër të aktiviteteve që do të organizojnë në qytetin Andican të Uzbekistanit, i cili është shpallur Kryeqyteti Kulturor i Botës Turke për vitin 2026, do t'u dërgojnë ftesa edhe partnerëve në Maqedoninë e Veriut.

Ai tha se në kuadër të vizitës së tij në vend do të marrë pjesë në edicionin e 66-të të Festivalit Veror të Ohrit dhe do të takohet me përfaqësues të Filarmonisë së Maqedonisë së Veriut dhe të Teatrit Turk.