Çmimet e naftës u rritën lehtë të premten, pasi mbyllja e vazhdueshme e Ngushticës së Hormuzit dhe tensionet në rritje detare mes ShBA-së dhe Iranit mbajtën në ankth tregjet globale të energjisë, pavarësisht zgjatjes së fundit të armëpushimit mes Izraelit dhe Libanit.
Nafta bruto Brent, standardi ndërkombëtar, u rrit me 0,63 për qind në 105.73 dollarë për fuçi, ndërsa standardi amerikan West Texas Intermediate (WTI) u rrit me 0,32 për qind në 96,17 dollarë.
Rritja erdhi pasi konflikti në Lindjen e Mesme vazhdoi të nxisë frikën për furnizimin me energji, me ShBA-në dhe Iranin që sekuestruan anije, ndërsa bllokadat detare mbajtën të mbyllur Ngushticën e Hormuzit.
Rreth 20 milionë fuçi naftë dhe produkte të naftës kalonin çdo ditë përmes kësaj ngushtice para luftës, duke e bërë atë një nga pikat më kritike të energjisë në botë.
Çmimet u rritën pavarësisht deklaratës së Presidentit amerikan Donald Trump të enjten, se Izraeli dhe Libani kishin rënë dakord të zgjasnin armëpushimin pas një takimi në Shtëpinë e Bardhë me zyrtarë të lartë amerikanë.
“Takimi shkoi shumë mirë!”, tha Trumpi në Truth Social, duke njoftuar zgjatjen.
Armëpushimi, i parashikuar fillimisht të zgjasë 10 ditë, pritet të japë më shumë kohë për bisedime diplomatike, ndërsa Uashingtoni gjithashtu premtoi mbështetje për forcimin e mbrojtjes së Libanit kundër Hezbollahut.
Megjithatë, armëpushimi ShBA-Iran nuk ka rikthyer trafikun normal në Ngushticën e Hormuzit, pasi konflikti është zhvendosur në bllokada detare, ku të dyja palët kërkojnë avantazh ekonomik për një marrëveshje më të gjerë.
Drejtori Ekzekutiv i Agjencisë Ndërkombëtare të Energjisë, Fatih Birol, paralajmëroi të enjten se bota po përballet me një kërcënim të paprecedentë për sigurinë energjetike për shkak të mbylljes së Hormuzit dhe ndërprerjeve më të gjera.
“Po përballemi me kërcënimin më të madh për sigurinë energjetike në histori”, tha Birol për CNBC. “Deri më sot kemi humbur 13 milionë fuçi në ditë... dhe ka ndërprerje të mëdha në mallra jetike”, shtoi ai.
Birol ka paralajmëruar më parë se lufta me Iranin dhe mbyllja e vazhdueshme e Ngushticës së Hormuzit mund të shkaktojnë “krizën më të madhe energjetike që kemi përjetuar ndonjëherë”, duke u bërë thirrje qeverive të forcojnë qëndrueshmërinë përmes burimeve alternative të energjisë.
