Gjermania planifikon të ndërtojë një bazë të re detare në qytetin Emden, në veriperëndim të vendit, mes përkeqësimit të situatës ndërkombëtare të sigurisë, tha të hënën ministri i Mbrojtjes, Boris Pistorius.

“Kjo është e rëndësishme për ne, sepse do të jetë një bazë e madhe detare”, tha Pistorius gjatë një ceremonie në Emden, ku zyrtarë të lartë nënshkruan një letër qëllimi për bazën.

“Prej këtu mund të arrijmë shpejt në Atlantikun e Veriut dhe Detin e Veriut. Vendndodhja strategjike është gjithashtu vendimtare, veçanërisht në lidhje me aleatët tanë të NATO-s, zonat tona të përbashkëta të trajnimit dhe operacioneve, si dhe aktivitetet e përbashkëta të trajnimit”, shtoi ai.

Baza e re do të jetë baza e pestë kryesore detare e Gjermanisë dhe pritet të lehtësojë ngarkesën e bazës në Wilhelmshaven, e cila aktualisht është pika më e rëndësishme e marinës në Detin e Veriut.

Burime nga Ministria e Mbrojtjes thanë se Wilhelmshaven do të mbetet qendrore, ndërsa baza në Emden do ta plotësojë atë.

Pistorius tha se Gjermania ka vendosur ta zgjerojë marinën e saj në përgjigje të kërcënimeve në rritje ndërkombëtare dhe përkeqësimit të situatës së sigurisë, si dhe për të përmbushur angazhimet e saj për parandalimin e NATO-s.

“Aktualisht kemi marinën më të vogël në historinë e Bundeswehr-it dhe në të njëjtën kohë grupin më të madh dhe më të gjerë të detyrave. Prandaj, marina duhet të rritet dhe do të rritet”, tha ai.

“Duke e pasur parasysh situatën aktuale ndërkombëtare të sigurisë, veçanërisht në lidhje me Detin Baltik, por mbi të gjitha me Detin e Veriut dhe Atlantikun e Veriut, kjo është e një rëndësie vendimtare, sepse përmes saj rrisim parandalimin e Gjermanisë dhe NATO-s”, tha ai.

Baza e planifikuar detare pritet të jetë një investim me vlerë disa miliardë euro, sipas raportimeve të mediave. Ajo pritet të arrijë gatishmërinë e plotë operacionale në vitin 2030 dhe në këtë lokacion mund të vendosen përfundimisht deri në 2.000 pjesëtarë të personelit ushtarak dhe civil.