Presidenti rus Vladimir Putin nuk e ka refuzuar asnjëherë zhvillimin e bisedimeve me presidentin ukrainas Volodymyr Zelenskyy dhe do t’i përgjigjej nëse ky i fundit do ta telefononte, deklaroi të dielën këshilltari i Kremlinit për politikën e jashtme, Yuri Ushakov.

Në një intervistë për një gazetar të televizionit Vesti, Ushakov tha se lideri rus mbetet i hapur për komunikim të drejtpërdrejtë me homologun e tij ukrainas.

“Besoj se do t’i përgjigjej, natyrisht. Putini nuk i ka refuzuar asnjëherë bisedimet”, tha Ushakov.

Ai gjithashtu deklaroi se Zelenskyy është i mirëpritur të udhëtojë në Moskë për të zhvilluar bisedime me Putinin.

“Ai po dërgon sinjale përmes burimeve të ndryshme. Dëshiron të bisedojë dhe, nëse dëshiron kaq shumë të bisedojë, le të vijë”, tha Ushakov.

- Kremlini propozon bisedime trepalëshe mes ShBA-së dhe Ukrainës

Duke folur për negociatat që synojnë zgjidhjen e konfliktit në Ukrainë, Ushakov tha se raundet fillestare duhet të përfshijnë Rusinë, Ukrainën dhe SHBA-në.

Ai sugjeroi që përfaqësuesit evropianë mund të marrin pjesë në një fazë të mëvonshme, duke theksuar se takimet e para duhet të zhvillohen në format trepalësh.

“Ne kemi kontakte pune me amerikanët. Prandaj, është logjike që të paktën raundet e para të bisedimeve të zhvillohen në format trepalësh”, tha ai.

- Samiti Rusi-Afrikë

Në një çështje tjetër, Ushakov tha se ata që synonin të pengonin samitin Rusi-Afrikë kanë dështuar, pa dhënë detaje të tjera.

Samiti i tretë Rusi-Afrikë, i cili për herë të parë u mbajt në Moskë, përfundoi më 29 tetor.

Në këtë takim morën pjesë delegacione nga 48 vende afrikane, përfshirë 22 krerë shtetesh.

Samiti i mëparshëm u mbajt në Shën Petersburg në vitin 2023, ndërsa takimi i parë u organizua në Soçi në vitin 2019.