Stilistja turke e modës u shpërngul në fshatin ku bënte kamp për t'u larguar nga stresi i Istanbulit

Stilistja turke e modës, 48-vjeçarja Yeliz Yildirim, e cila jetonte në Istanbul, u vendos në fshatin Kucukyayla të rrethit Vize në Kirklareli, ku kishte bërë kamp me tendë 7 vite më parë, për t'u larguar nga stresi i jetës në qytet.

Yildirim, e cila në shkurt të vitit 2019 kishte ardhur në fshat për të bërë kamp me miqtë e saj, u ndikua nga jeta në harmoni me natyrën dhe bleu një tokë në zonë.

Në tokën që bleu, Yildirim ndërtoi një shtëpi të vogël fshati dhe në të njëjtin vit la jetën në Stamboll për t'u zhvendosur në fshat.

Duke u përshtatur në një kohë të shkurtër me jetën në fshat, Yildirim u orientua drejt prodhimit natyror në tokën e saj. Ajo mbarështon 20 dhi, si dhe pula, gjela deti dhe rosa.

Gjithashtu, me miellin që përfiton nga gruri që mbjell, ajo përgatit vetë bukën e saj.

"Këtu ndihem sikur kam rilindur"

Yeliz Yildirim tha për Anadolu se pasi u vendos në fshat, filloi të prodhojë djathë pa aditivë nga qumështi i dhive, ndërsa bukën e përgatit me grurë nga fara tradicionale.

Duke theksuar se ditën e nis herët në mëngjes, Yildirim tregoi se pjesën më të madhe të ditës e kalon me kujdesin për kafshët dhe punët e prodhimit.

Ajo shtoi se kur nisi jetën në fshat, disa miq i kishin thënë: "Nuk do t'ia dalësh, do të kthehesh", por ajo nuk mund të heqë dorë nga jeta në harmoni me natyrën.

Duke theksuar se jeta në fshat i jep qetësi, Yildirim tha: "Këtu ndihem sikur kam rilindur. Çdo mëngjes, pa asnjë presion, të jetosh në harmoni me kafshët dhe të jesh në kontakt me tokën dhe pyllin është një ndjenjë vërtet shumë e bukur".

Yildirim shtoi se jeta në fshat është shumë më ndryshe dhe më e qetë krahasuar me jetën në Istanbul.