Qeveria e Austrisë të premten miratoi një ndalim kombëtar të përdorimit të mediave sociale për fëmijët nën 14 vjeç dhe prezantoi plane për t’i reformuar programet e shkollave të mesme të larta për të forcuar edukimin mediatik dhe atë mbi Inteligjencën Artificiale (IA), duke filluar nga viti shkollor 2027/28.

Zv/kancelari Andreas Babler tha në një konferencë për shtyp se platformat e medieve sociale kanë “efekte negative tek të rinjtë” dhe theksoi nevojën për kufizime moshe të ngjashme me ato që aplikohen për substanca dhe përmbajtje të caktuara mediatike.

Ai shtoi se ndalimi do të zbatohet në nivel kombëtar, ndërsa Austria do t’i vazhdojë përpjekjet për të mbështetur masa të ngjashme në gjithë Bashkimin Evropian.

Reforma e programeve shkollore do të prezantojë një lëndë të veçantë për edukimin mediatik në shkollat e mesme të larta, ndërsa disa orë mësimi të gjuhës latine dhe gjuhës së dytë të huaj do të ulen.

Klasat e informatikës gjithashtu do të zgjerohen dhe përditësohen për të përfshirë AI, duke u fokusuar në kuptimin e sistemeve digjitale dhe identifikimin e rreziqeve dhe mundësive.

Sekretari Shtetëror për Digjitalizimin, Alexander Proll, tha se një propozim ligjor që përshkruan implementimin teknik të kufirit të moshës do të prezantohet deri në fund të qershorit, duke përdorur metoda verifikimi që konfirmojnë moshën e përdoruesve pa komprometuar privatësinë.

Qeveria përjashtoi mundësinë e një politike të detyrueshme me emrin e vërtetë, por premtoi zbatim më të rreptë kundër keqpërdorimit të të dhënave të përdoruesve dhe bashkëpunim më të ngushtë midis platformave të medieve sociale dhe autoriteteve për ta adresuar dëmin onlajn.

Presidenti francez Emmanuel Macron reagoi ndaj vendimit në kompaninë amerikane të mediave sociale X, duke thënë: “Faleminderit që iu bashkuat lëvizjes.”

Masat e Austrisë reflektojnë një tendencë ndërkombëtare në rritje për ta kufizuar qasjen e të miturve në platformat e medieve sociale.

Australia ndaloi qasjen në mediet sociale për fëmijët nën 16 vjeç në dhjetor 2025, ndërsa Franca planifikon të prezantojë kufizime për përdoruesit nën 15 vjeç duke filluar nga shtatori 2026.

Spanja dhe disa rajone të Indisë, përfshirë shtetin Karnataka, gjithashtu kanë njoftuar kufizime që prekin përdoruesit nën 16 vjeç.

Vende të tjera evropiane, përfshirë Danimarkën, Gjermaninë, Norvegjinë dhe Mbretërinë e Bashkuar, po konsiderojnë rregulla të ngjashme.