Lumir Abdixhiku, kryetar i Lidhjes Demokratike të Kosovës (LDK), ka bërë të ditur se partia që ai udhëheq ka vendosur të heqë dorë nga çdo kërkesë e mundshme për formimin e institucioneve të reja të Republikës së Kosovës.

Abdixhiku, në një konferencë për media pas mbledhjes së deputetëve të LDK-së, ka thënë se partia heq dorë si nga kërkesa për të pasur pozitën e presidentit të ri të vendit, ashtu edhe nga ndonjë marrëveshje tjetër politike si kushtëzim për formimin e institucioneve të reja.

“LDK-ja heq dorë nga çdo kërkesë për pjesëmarrje në qeveri. S’e duam asnjë ministri. Le t’i mbajë Lëvizja Vetëvendosje. Heqim dorë nga kërkesa për Kryetar të Kuvendit dhe, më e rëndësishmja, edhe nga kërkesa për të udhëhequr postin e presidentit”, deklaroi Abdixhiku.

Abdixhiku tha se LDK-ja kërkon bashkëpunimin e të gjitha partive për të zgjedhur një president “që e mbron Republikën”.

Kreu i LDK-së tha se oferta e Vetëvendosjes për LDK-në ka qenë që kjo parti “të bëhet dekor”.

Sipas tij, VV-ja ia ka ofruar tri ministri LDK-së, duke i kërkuar postet tjera për vete.

“Meqë LVV-ja po vlerëson se s’ka nevojë për LDK-në si partnere, s’do ta ketë as si dekor. Në rrethana të tilla, do të qëndrojmë në opozitë, ku qytetarët na kanë vendosur dhe do të ushtrojmë këtë përgjegjësi me dinjitet. Pavarësisht këtij qëndrimi, LDK-ja s’do ta shndërrojë zhgënjimin politik në bllokadë. Jemi të gatshëm të bisedojmë për zgjidhjen e një presidenti që mbron interesat e Republikës”, theksoi ai.

Ai tha se LDK-ja ka kritere për presidentin e ardhshëm. Sipas tij, kjo është që të ketë president që mbron Republikën dhe Kushtetutën.