Ministri irakian i Naftës: Tubacioni Kirkuk-Türkiye do të jetë gati “brenda një jave”
Tubacioni ka kapacitet prej 200.000–250.000 fuçi në ditë, ndërsa testimet përfundimtare janë ende në zhvillim, tha ministri i Naftës së Irakut, Hayyan Abdul Ghani.
Zëvendëskryeministri dhe ministri i Naftës së Irakut, Hayyan Abdul Ghani, deklaroi të hënën se po përgatiten plane alternative eksporti për shkak të ndalimit të eksporteve të naftës përmes Ngushticës së Hormuzit dhe se tubacioni i naftës Kirkuk-Türkiye mund të rivihet në funksion “brenda një jave” pa kaluar nëpër territorin e Qeverisë Rajonale Kurde të Irakut (KRG).
Në një deklaratë me video, ministri theksoi se prodhimi i naftës bruto të Irakut është rreth 4,4 milionë fuçi në ditë sipas kuotës së tij në OPEC.
Megjithatë ai tha se disa ditë pas fillimit të luftës, eksportet e naftës të Irakut u ndalën për shkak të zhvillimeve ushtarake në Gjirin Persik dhe mbylljes së Ngushticës së Hormuzit.
Abdul Ghani vuri në pah se Iraku më parë eksportonte rreth 3,4 milionë fuçi naftë në ditë, kryesisht përmes porteve jugore dhe veçanërisht me anë të Terminalit të Naftës në Basra; por pas mbylljes së Ngushticës së Hormuzit, Ministria e Naftës u detyrua ta ulë prodhimin në fushat e naftës.
“Prodhimi i naftës tani është ulur në 1,5–1,6 milionë fuçi në ditë për t’i përmbushur nevojat e rafinerive dhe të termocentraleve. Rafineritë aktualisht po funksionojnë në nivelin më të lartë të kapaciteteve të tyre të projektimit, duke vazhduar prodhimin e benzinës, naftës, produkteve të bardha të naftës dhe LPG-së (gaz i lëngëzuar i naftës së papërpunuar). Përveç kësaj, një sasi e caktuar rezervash po mbahet për emergjenca”, shtoi ai.
Ministri tha gjithashtu se Iraku po vlerëson dërgimin e naftës përmes Portit Ceyhan në Türkiye për të rifilluar eksportet. Ai shtoi se janë hapur tenderë edhe për eksport përmes Portit Baniyas në Siri dhe përmes tubacionit drejt Aqabas.
Ai theksoi se tubacioni Irak-Türkiye, i cili transporton naftën e Kirkukut drejt Türkiyes, ka një kapacitet prej 200.000–250.000 fuçi në ditë dhe se aktualisht po zhvillohen testimet përfundimtare dhe punimet e mirëmbajtjes.
Abdul Ghani tha se testimi hidrostatik që ka mbetur në një segment rreth 100 kilometra të gjatë, pritet të përfundojë brenda një jave.
“Nafta do të furnizohet drejtpërdrejt nga fushat e Kirkukut në tubacion (Irak-Türkiye) dhe mund të dërgohet në Türkiye pa kaluar përmes KRG-së”, saktësoi ai.