Pas 43 vitesh kërkimesh, arkeologët zbulojnë tempullin e lashtë të Zeusit në jugperëndim të Türkiyes

Një tempull i Zeusit është zbuluar pas një kërkimi 43-vjeçar në qytetin antik të Limyrës në Antalya, përgjatë Rivierës Turke, bëri të ditur drejtuesi i gërmimeve për Anadolun.

Përpjekjet për ta gjetur tempullin, i cili u ndërtua në epokën klasike, kanë qenë në vazhdim që nga viti 1982.

“Ne e dimë qartë nga burimet e shkruara se gjatë periudhave helenistike dhe romake, zoti kryesor i qytetit ishte Zeusi. Dihej se ekzistonte një tempull, por vendndodhja e tij nuk ishte gjetur ende”, tha arkeologu Kudret Sezgin nga Universiteti Hitit në veri të Türkiyes, koordinator i gërmimeve në Limyra.

Sezgin theksoi se zbulimi çoi në rishikimin e disa teorive të mëparshme mbi strukturën e qytetit.

“Fasada e përparme e tempullit është 15 metra e gjerë. Mbi tempull është ndërtuar një mur gjatë periudhës bizantine. Një dhomë e shenjtë ndodhet nën një kopsht portokallesh privat, jashtë murit”, tha ai, duke shtuar se ekipi i gërmimeve do të vazhdojë punën pas përfundimit të procesit të shpronësimit.

Ai shtoi gjithashtu se qeramika e gjetur në tempull tregon se qyteti daton rreth 5.000 vjet më parë.

“Është arritur në përfundimin se porta monumentale, e quajtur propylon, e identifikuar prej vitesh nën rrugën romake, ishte hyrja që çonte në zonën e shenjtë të tempullit gjatë periudhës klasike. Gjithashtu, u konkludua se muri i qytetit i njohur si strukturë e epokës helenistike ka shërbyer si mur mbrojtës i perimetrit të tempullit”, shtoi Sezgin.