Shpërthime në Ukrainë, një i vrarë dhe 25 të plagosur

Ukraina njoftoi të dielën se të paktën një person u vra dhe 25 të tjerë u plagosën si pasojë e shpërthimit të mjeteve shpërthyese në qytetin perëndimor Lviv.

Policia Kombëtare e Ukrainës bëri të ditur në një deklaratë se linja e saj e emergjencës mori një njoftim rreth orës 00:30 me orën lokale të së dielës (22:30 GMT të shtunën) për një hyrje me forcë në një dyqan në Lviv, ndërsa një shpërthim ndodhi në vendngjarje pasi mbërriti një patrullë policie.

“Sipas të dhënave paraprake, u konstatua se shpërthyen mjete shpërthyese artizanale. Si pasojë e shpërthimeve humbi jetën një police 23-vjeçare”, thuhet në deklaratë, duke shtuar se 24 persona të tjerë u plagosën dhe se një shpërthim tjetër u dëgjua pasi në vendngjarje mbërriti edhe një patrullë e dytë.

Deklarata shton se në vendngjarje punuan një grup hetimor, ekspertë të lëndëve shpërthyese dhe shërbime të tjera të specializuara, ndërsa të plagosurve po u ofrohet ndihma e nevojshme mjekësore.

Autoritetet e cilësuan incidentin si “sulm terrorist”, duke bërë të ditur se janë nisur procedura penale sipas Kodit Penal të vendit dhe se hetimi paraprak po kryhet nga shërbimi rajonal kundër terrorizmit.

Guvernatori i rajonit të Lvivit, Maksym Kozytskyi, shkroi në Telegram se autorët e dyshuar përballen me deri në 12 vjet burgim dhe konfiskim pasurie, duke e cilësuar gjithashtu ngjarjen si “sulm terrorist”.

Duke vënë në dukje se disa nga të plagosurit janë në gjendje të rëndë, ai më vonë raportoi se numri i të plagosurve është rritur në 25.

Presidenti ukrainas Volodymyr Zelenskyy deklaroi më pas në platformën X se ministri i Brendshëm, Ihor Klymenko, e kishte informuar për ndalimin e një personi të dyshuar për kryerjen e incidentit.

Askush nuk ka marrë ende përgjegjësinë për ngjarjen dhe autoritetet nuk kanë bërë publik emrin e ndonjë të dyshuari.