Erdoğan: Kostot e tërmeteve 2023 në Türkiye, 104 mld $ dëme direkte, 150 mld $ indirekte

Tërmetet e 6 shkurtit 2023 në jug të Türkiyes shkaktuan një kosto ekonomike prej rreth 250 miliardë dollarësh, duke përfshirë dëmet direkte dhe indirekte, deklaroi të premten presidenti i vendit.

“Këto tërmete, një nga fatkeqësitë më të mëdha në historinë tonë, patën një kosto direkte për ekonominë tonë prej 104 miliardë dollarësh dhe një kosto indirekte prej 150 miliardë dollarësh”, tha Recep Tayyip Erdoğan gjatë një ceremonie përkujtimore në Osmaniye, në jug të Türkiyes.

Ai theksoi se shteti dhe populli turk vepruan së bashku për të shëruar plagët e shkaktuara nga tërmetet, duke shtuar: “Ia treguam edhe një herë botës forcën e Türkiyes”.

Erdoğan akuzoi kritikët e qeverisë se janë përpjekur të shfrytëzojnë emocionalisht viktimat e tërmeteve. “Nuk ka shpifje, gënjeshtër apo dezinformim që këta ‘turistë të tërmetit’ të mos e kenë përhapur”, tha ai, duke i akuzuar se kanë përdorur zonat e goditura vetëm për fotografi, pa ndihmuar të mbijetuarit.

Presidenti turk deklaroi se brenda tre vjetësh qeveria ka rindërtuar dhe ringjallur qytetet e goditura nga tërmetet, ndërsa deri më tani janë dorëzuar 455 mijë banesa për të mbijetuarit në provincat e prekura.

Dy tërmetet e 6 shkurtit 2023, me epiqendër në provincën jugore Kahramanmaraş, shkaktuan shkatërrime të mëdha në 11 provinca të Türkiyes jugore, duke lënë dhjetëra mijëra të vdekur dhe dëme të mëdha në infrastrukturë dhe banesa.

Sipas një raporti të Zyrës Turke për Strategji dhe Buxhet, Türkiye ka shpenzuar gjithsej 3,6 trilionë lira turke (rreth 91,5 miliardë dollarë) gjatë tri viteve të fundit për t’i kompensuar dëmet pas tërmeteve, veçanërisht në Kahramanmaraş dhe Hatay.