Një grup i parë pilotësh dhe teknikësh turq pritet të udhëtojë në Mbretërinë e Bashkuar në gusht për të nisur trajnimin për avionët luftarakë Eurofighter Typhoon, bëri të ditur Ministria turke e Mbrojtjes Kombëtare.

Dërgimi i personelit vjen pas një marrëveshjeje logjistike dhe teknike mes Ankarasë dhe Londrës, që synon të përshpejtojë integrimin e avionëve në Forcat Ajrore të Türkiyes.

Türkiye nënshkroi në tetor të vitit 2025 një marrëveshje me vlerë 8 miliardë paund (10,7 miliardë dollarë) për blerjen e 20 avionëve Eurofighter, gjatë takimit në Ankara mes presidentit turk Recep Tayyip Erdoğan dhe ish-kryeministrit britanik Keir Starmer.

“Në kuadër të marrëveshjes së nënshkruar, personeli i fluturimit dhe mirëmbajtjes do të vazhdojë të udhëtojë çdo vit drejt Mbretërisë së Bashkuar”, deklaroi të enjten zëdhënësi i Ministrisë së Mbrojtjes, Zeki Aktürk, gjatë konferencës javore për media.

Avionët Typhoon me dy motorë prodhohen nga një konsorcium i përbërë nga kompania britanike BAE Systems, Airbus dhe kompania italiane Leonardo.

Më herët, drejtori ekzekutiv i Airbus Defence and Space, Michael Schoellhorn, deklaroi se marrëveshja për Eurofighter mund të krijojë një partneritet afatgjatë me Türkiyen, ndërsa palët rrisin prodhimin dhe zhvillojnë modele më të avancuara me teknologji të reja.

Të dyja vendet kanë nënshkruar gjithashtu një marrëveshje më të gjerë kornizë për zgjerimin e bashkëpunimit në fushën e mbrojtjes dhe industrisë së mbrojtjes.

Avionët Eurofighter Typhoon përdoren aktualisht nga pesë vende evropiane, Mbretëria e Bashkuar, Gjermania, Italia, Spanja dhe Austria, si dhe nga katër vende të Gjirit: Arabia Saudite, Omani, Kuvajti dhe Katari.