Katër palestinezë nga e njëjta familje u vranë sot në një sulm ajror izraelit ndaj një shtëpie në Beit Lahia, në veri të Rripit të Gazës, pavarësisht armëpushimit në fuqi, sipas një burimi mjekësor.

Burimi i tha Anadolu-t se katër trupat u dërguan në spitalin "Al-Shifa" në qytetin e Gazës, pasi sulmi goditi një shtëpi që i përkiste familjes Ahmed në zonën e Beit Lahia-s.

Burimi tha se disa persona të tjerë u plagosën në sulm ndërsa shumë persona rezultojnë të zhdukur nën rrënoja.

Ndërkohë, disa të plagosur u dërguan në spitalin "Al-Shifa" sot herët, pasi automjete ushtarake dhe një dron izraelit hapën zjarr ndaj strehimoreve dhe çadrave ku qëndronin palestinezët e zhvendosur në kampin e refugjatëve në Jabalia, në veri të Gazës, raportoi agjencia e lajmeve WAFA.

Avionët luftarakë izraelitë kryen gjithashtu sulm ajror pranë spitalit "Kamal Adwan" në kamp.

Veçmas, anijet ushtarake izraelite hapën zjarr të dendur në ujërat pranë Khan Younisit dhe në zonat në lindje të pjesës qendrore të Rripit të Gazës. Sulmet shënojnë shkeljet e fundit izraelite të marrëveshjes së armëpushimit, e cila është në fuqi që nga 10 tetori 2025.

Ushtria izraelite ka vrarë më shumë se 73 mijë palestinezë dhe ka plagosur mbi 174 mijë të tjerë në një luftë brutale që prej tetorit 2023, e cila ka shkatërruar ose dëmtuar një pjesë të madhe të infrastrukturës civile të Gazës.