Në qendrën e zhurmshme të kryeqytetit të Bosnjës e Hercegovinës, Sarajevë, të hënën kanë vazhduar protestat për shkak të aksidentit me tramvaj, në të cilin humbi jetën Erdoan Morankiq, ndërsa Ella Jovanoviq u lëndua rëndë, dhe tre persona të tjerë u lënduan lehtë.
Protestat po mbahen për ditën e katërt radhazi, ndërsa një numër i madh nxënësish të shkollave të mesme dhe studentësh u mblodhën para Muzeut Kombëtar, të vendosur të kërkojnë përgjegjësi nga të gjithë hallkat e sistemit.
Të mbledhurit mbajnë pankarta me mesazhe si: “Nuk dolëm nga ora e mësimit, por për të ardhmen”, “Një rrugë, një jetë” dhe “Nënat nuk duhet të mësojnë si ndizet qiri për fëmijën e tyre”.
Qarkullimi është bllokuar plotësisht në të dy drejtimet pranë stacionit të tramvajit ku ndodhi aksidenti të enjten, ndërsa kolona e të rinjve po lëviz ngadalë drejt Skenderisë dhe Marijin Dvorit.
Demonstruesit u bëjnë thirrje qytetarëve të dalin nga qendra tregtare SCC dhe t’u bashkohen protestave, duke i përshëndetur me duartrokitje të gjithë ata që u bashkohen.
Të mbledhurit theksojnë se dorëheqja e kryeministrit kantonal Nihad Uk dhe rrëzimi i Qeverisë së Kantonit të Sarajevës nuk do të thotë fund i kërkesave të tyre. Ata kërkojnë përgjegjësi nga të gjithë në zinxhir, nga Qeveria e KS-së, ministria përkatëse, deri te GRAS-i, drejtori i të cilit ende nuk është deklaruar lidhur me tragjedinë.
Punëtorët e GRAS-it kanë paralajmëruar një protestë paqësore në shenjë kujtimi për viktimën e ndjerë dhe në mbështetje të kolegut të tyre, Adnan Kasapoviq, drejtuesit të tramvajit.
Demonstruesit planifikojnë një marshim drejt Spitalit të Përgjithshëm, ku ndodhet e plagosura rëndë Ella Jovanoviq, dhe paralajmërojnë se do të vazhdojnë bllokimin e akseve kryesore të qarkullimit në Sarajevë deri në përmbushjen e kërkesave të tyre për përgjegjësi dhe drejtësi.
Protestat po zhvillohen në prani të forcave policore, por për momentin po kalojnë pa incidente.
Këto protesta përfaqësojnë vazhdimin e tubimeve të mëparshme pranë Muzeut, Spitalit të Përgjithshëm, SCC-së dhe Skenderisë, me qëllim që Prokuroria e Kantonit të Sarajevës dhe Gjykata Kantonele të reagojnë në mënyrë profesionale dhe efikase, duke siguruar që përgjegjësit të mbajnë përgjegjësi.
