Komisioni Evropian ka rekomanduar zyrtarisht ndërprerjen e një granti prej 2 milionë eurosh, rreth 2,3 milionë dollarë, për Bienalen e Venecias, për shkak të rihapjes së pavijonit të Rusisë, tha një zyrtare e lartë e BE-së.
Henna Virkkunen, nënkryetare ekzekutive e Komisionit Evropian për sovranitetin teknologjik, sigurinë dhe demokracinë, tha të shtunën se rekomandimi iu bë Agjencisë Ekzekutive Evropiane për Arsimin dhe Kulturën (EACEA).
“Komisioni i rekomandon zyrtarisht EACEA-s ndërprerjen e grantit prej 2 milionë eurosh për Bienalen e Venecias”, shkroi Virkkunen në një postim në X.
Ajo tha se masa pasoi “një vlerësim të plotë” të përgjigjes së Bienales, e cila justifikoi rihapjen e pavijonit të Rusisë.
“Kultura në Evropë, e financuar me paratë e taksapaguesve, duhet të promovojë dhe të mbrojë vlerat demokratike”, tha Virkkunen. “Këto vlera nuk respektohen në Rusinë e sotme”.
