Zhduket një helikopter turistik me tre persona pranë malit Aso në Japoni
Ekipet e shpëtimit janë mobilizuar për të kërkuar helikopterin në zonë.
Një helikopter u zhduk sot pranë majës së malit Aso në provincën Kumamoto të Japonisë jugperëndimore, raportoi Kyodo News, duke cituar autoritetet lokale dhe një strukturë turistike aty pranë.
Besohet se helikopteri që u nis nga kopshti zoologjik "Aso Cuddly Dominion" mbante tre persona, dy pasagjerë nga Tajvani dhe një pilot.
Sipas operatorit, helikopteri kur u zhduk ishte në fluturimin e tretë turistik të ditës dhe nuk ishin raportuar probleme gjatë dy fluturimeve të para.
Ekipet e shpëtimit u mobilizuan për të kërkuar në zonë, megjithëse detajet rreth gjendjes së helikopterit ose vendndodhjes së saktë mbetën të paqarta.
Mali Aso është një vullkan aktiv dhe destinacion i njohur turistik në Japoni.