Ukraina dhe Moldavia njoftojnë ndërprerje masive të energjisë elektrike
“Në sistemin energjetik të vendit ka ndodhur një “çrregullim teknologjik”, që ka sjellë ndërprerjen e linjës së energjisë”, tha ministri i Energjisë i Ukrainës.
Ukraina dhe Moldavia njoftuan të shtunën për ndërprerje masive të energjisë elektrike, përfshirë edhe në kryeqytetet e tyre, ndërsa Ukraina po përballet me një gjendje emergjence në sektorin energjetik mes kushteve të ashpra dimërore.
Ministri ukrainas i Energjisë, Denys Shmyhal, tha në një deklaratë në Telegram se në sistemin energjetik të vendit ka ndodhur një “çrregullim teknologjik”, i cili ka sjellë ndërprerjen e linjës së energjisë 750 kV që lidh rajonet perëndimore dhe qendrore të Ukrainës, si dhe të linjës 400 kV mes sistemeve energjetike të Rumanisë dhe Moldavisë.
Duke bërë të ditur se defekti ka ndodhur në orën 10:42 sipas kohës lokale (08:42 GMT), Shmyhal tha se kjo ka shkaktuar një “zinxhir shkëputjesh” në rrjetin energjetik të Ukrainës dhe aktivizimin e “mbrojtjeve automatike” në nënstacione.
“Të gjitha masat e nevojshme të reagimit në nivel të sistemit energjetik të Ukrainës janë ndërmarrë dhe puna për rikthimin e energjisë po vazhdon. Detyra tani është stabilizimi i situatës sa më shpejt të jetë e mundur”, shkroi Presidenti ukrainas Volodymyr Zelenskyy në platformën X, pasi mori raportime nga Shmyhal dhe kryeministrja Yulia Svyrydenko mbi situatën.
Ministria e Energjisë e Ukrainës njoftoi më herët se ndërprerje emergjente të energjisë janë zbatuar në disa rajone, përfshirë Kievin dhe Kharkivin, me urdhër të operatorit të rrjetit energjetik të vendit, Ukrenergo. Ky i fundit njoftoi veçmas se ndërprerje emergjente janë në fuqi edhe në rajonet Cherkasy, Chernihiv dhe Zhytomyr.
“Sipas parashikimeve të ekspertëve, furnizimi me energji pritet të rikthehet brenda dy deri në tre orësh”, shtoi ministria, duke njoftuar më vonë se sistemi energjetik i vendit po rikuperohet gradualisht dhe se po punohet për rikthimin e furnizimit, me prioritet furnizimin e infrastrukturës kritike.
Ndërkohë, kompania private ukrainase e energjisë DTEK njoftoi gjithashtu për zbatimin e ndërprerjeve emergjente të energjisë në rajonet Odesa dhe Dnipropetrovsk, me udhëzim të Ukrenergo-s.
Kryetari i Bashkisë së Kievit, Vitali Klitschko, konfirmoi ndërprerjet emergjente të energjisë në kryeqytetin ukrainas, duke thënë se metroja e qytetit ka ndalur funksionimin “për shkak të tensionit të ulët në rrjet” dhe se stacionet nëntokësore të metrosë aktualisht mund të shërbejnë si strehimore.
Shmyhal njoftoi më vonë se furnizimi me energji për infrastrukturën kritike është rikthyer në kryeqytet, si dhe në rajonet Kiev dhe Dnipropetrovsk.
Në Moldavinë fqinje, Ministria e Energjisë njoftoi në Telegram se një rënie e tensionit ka ndodhur të shtunën në mëngjes në linjën 400 kV Isaccea–Vulcanesti–MGRES, duke shkaktuar një “shkëputje të dëmtuar” të sistemit energjetik të vendit.
Duke përmendur “probleme serioze në rrjetin energjetik të Ukrainës” si shkak të ndërprerjes, ministria tha se operatori i sistemit të transmetimit të energjisë, Moldelectrica, po punon për zgjidhjen e situatës, duke shtuar se tensioni është rikthyer tashmë në disa zona.
Kryetari i Bashkisë së Kishinau, Ion Ceban, tha se ndërprerje të energjisë kanë ndodhur në shumicën e kryeqytetit moldav, ndërsa kryeministri Alexandru Munteanu u bëri thirrje qytetarëve të “qëndrojnë të bashkuar” dhe të “besojnë se institucionet po punojnë për ta zgjidhur shpejt problemin”, në një deklaratë në Facebook.
Ministria njoftoi më vonë se të gjitha linjat e energjisë 110 kV në jug të Moldavisë janë rilidhur, ndërsa pjesët e mbetura të vendit, përfshirë Kishinaun, po rilidhen gradualisht.
Ndërprerjet vijnë në një kohë kur Ukraina po përballet me një gjendje emergjence në sektorin energjetik, e shpallur më herët këtë muaj për shkak të motit ekstrem dhe sulmeve ruse ndaj infrastrukturës energjetike.
Të enjten, Qendra Hidrometeorologjike e Ukrainës njoftoi se temperaturat në rajonet Rivne, Zhytomyr, Kiev, Chernihiv, Sumy, Poltava dhe Kharkiv pritet të zbresin deri në minus 30 gradë Celsius më 1–3 shkurt.
Qendra shtoi se, me përjashtim të Ukrainës jugore dhe rajonit Zakarpattia, temperaturat në pjesët e tjera të vendit pritet të bien mes minus 20 dhe minus 27 gradë Celsius gjatë së njëjtës periudhë.