Izraeli nuk mund ta ndalojë shembjen e shtëpive në jug të Libanit, deklaroi të mërkurën ministri izraelit i Sigurisë Kombëtare, Itamar Ben-Gvir, pas deklaratave të nënpresidentit amerikan JD Vance se draft-marrëveshja me Iranin përfshin edhe Libanin.
“Izraeli nuk mund të ndalojë shembjen e shtëpive në jug të Libanit. Thjesht nuk mund të ndalemi, kaq”, tha Ben-Gvir në deklarata të transmetuara nga kanali i Knessetit.
“Nuk mund të lejojmë që banorët e jugut të Libanit të kthehen. Duhet të vazhdojmë të kontrollojmë territorin edhe nëse nuk pajtohemi me (Presidentin amerikan Donald) Trump. Ne jemi një shtet i pavarur”, shtoi ai.
Në deklaratat e tij të hershme të së mërkurës, Vance e përshkroi marrëveshjen me Iranin si “paqe rajonale”, duke thënë se ajo “do të përfshijë shtetet e Gjirit, Izraelin dhe gjithashtu Libanin”.
“Ideja themelore është se kjo është një marrëveshje e vërtetë paqeje rajonale”, shtoi ai.
Tensionet kanë vazhduar përgjatë kufirit libanezo-izraelit pavarësisht mirëkuptimit të fundit mes Uashingtonit dhe Teheranit për t’i dhënë fund konfliktit ushtarak që shpërtheu pasi Izraeli dhe Shtetet e Bashkuara nisën sulme kundër Iranit më 28 shkurt.
Zyrtarët iranianë kanë deklaruar vazhdimisht se ndalimi i sulmeve izraelite në fronte të ndryshme rajonale, veçanërisht në Liban, është ndër objektivat kryesore të memorandumit të mirëkuptimit që pritet të nënshkruhet mes Teheranit dhe Uashingtonit të premten.
Megjithatë, zyrtarët izraelitë kanë lënë të kuptohet se operacionet ushtarake në Liban do të vazhdojnë pavarësisht marrëveshjes, duke ngritur pikëpyetje mbi mundësinë e uljes së tensioneve në frontin libanez.
Izraeli po zhvillon një ofensivë në Liban që nga 2 marsi, e cila sipas shifrave zyrtare ka lënë mijëra të vrarë e të plagosur dhe ka zhvendosur më shumë se një milion njerëz.
Izraeli mban nën kontroll zona në jug të Libanit, disa prej tyre prej dekadash dhe të tjera që nga lufta e mëparshme e viteve 2023–2024. Gjatë ofensivës aktuale, forcat izraelite avancuan më shumë se 10 kilometra brenda territorit libanez.
