Transporti hekurudhor në Shqipëri po humbet gjithnjë e më shumë atraktivitin, duke reflektuar një rënie të ndjeshme të numrit të udhëtarëve, me shifra zyrtare që janë pothuajse të përgjysmuara krahasuar me periudhat e mëparshme. Në kontrast me këtë tendencë, transporti detar dhe ai ajror kanë shënuar rritje gjatë vitit të kaluar, duke dëshmuar një interes gjithnjë e më të madh të udhëtarëve për këto forma transporti

Transporti hekurudhor

Referuar të dhënave statistikore për vitin 2025, transporti hekurudhor si mjet udhëtimi është përdorur nga 4,146

pasagjerë, duke shënuar ulje me afro 46% krahasuar me të njëjtën periudhë të vitit të kaluar. 

Viti 2024 ka pasur 7,740 pasagjerë që kanë zgjedhur të udhëtojnë me tren. Edhe pse një numër i ulët në vetvete, asnjë muaj nuk ka shënuar 0 pasagjerë, siç regjistrohet në dhjetor të vitit 2025.

Transporti ajror

Ndërkaq, për vitin 2025, totali i pasagjerëve me avion është shënuar në 11,640,070. Në periudhën janar - dhjetor  2024, totali i pasagjerëve që “fluturuan” ishte 10,708,995.

Thënë ndryshe, teksa trendi i transportit hekurudhor është në rënie, aeroportet në Shqipëri kanë pasur 931,075 udhëtarë më shumë në 2025, duke dëshmuar kontrastin e thellë midis “boom-it” të fluturimeve dhe stacioneve bosh të trenave.

Transporti detar

Transporti detar rezulton të jetë i dyti në zgjedhjen e udhëtarëve pas fluturimeve me avion. Dhe, në vitin që lamë pas ka shënuar dhe një rritje me afro 6.4% krahasuar me 2024-ën. 

Referuar INSTAT, totali i pasagjerëve që përdorën transportin detar në vitin 2025 ishte 1.696.649 ose 101.323 më shumë se në vitin 2024.