Türkiye do të jetë mikpritëse e raundit të dytë të bisedimeve mes Pakistanit dhe Afganistanit, që do të zhvillohen në Istanbul të shtunën, më 25 tetor 2025, njoftuan Ministria e Jashtme e Pakistanit dhe zyrtarë afganë të premten.

Zëdhënësi i Ministrisë së Jashtme të Pakistanit, Tahir Hussain Andrabi, deklaroi në Islamabad se takimi synon krijimin e një mekanizmi konkret dhe të verifikueshëm për monitorim, që do të ndihmojë në ndalimin e terrorizmit ndërkufitar.

“Përshëndesim marrëveshjen e arritur mes Pakistanit dhe Afganistanit në Doha më 19 tetor 2025 si një hap të parë drejt paqes dhe stabilitetit rajonal”, tha Andrabi.

Ai shtoi se Pakistani pret që në takimin e Istanbulit të konkretizohet ky mekanizëm për të adresuar kërcënimet nga territori afgan dhe për të parandaluar humbje të tjera jete në Pakistan.

Delegacioni afgan i udhëhequr nga zëvendësministri i Brendshëm

Nga ana tjetër, zëdhënësi i administratës së përkohshme afgane, Zabihullah Mujahid, konfirmoi pjesëmarrjen e Afganistanit në takimin e Istanbulit. Ai njoftoi se delegacioni afgan do të drejtohet nga Mawlawi Rahmatullah Najeeb, zëvendësministër i Brendshëm.

“Çështjet e mbetura me Pakistanin do të diskutohen në këtë takim”, shkroi Mujahid në X, duke shtuar se delegacioni tashmë është nisur nga Kabuli për në Istanbul.

Prelud i një armëpushimi pas përleshjeve në kufi

Takimi i Istanbulit pason një javë përleshjesh vdekjeprurëse në kufirin mes dy vendeve, që çuan në bisedime të ndërmjetësuara nga Katari dhe Türkiye në Doha, të cilat rezultuan me një armëpushim që aktualisht është në fuqi.

Zëdhënësi Andrabi falënderoi Katarin dhe Türkiyen për rolin e tyre “konstruktiv dhe të dobishëm” në lehtësimin e dialogut mes Islamabadit dhe Kabulit.