Presidenti ukrainas Volodymyr Zelenskyy ka njoftuar se takimi i parë trepalësh ndërmjet ShBA-së, Rusisë dhe Ukrainës do të zhvillohet në Emiratet e Bashkuara Arabe (EBA) të premten dhe të shtunën.

Duke folur të enjten në një seancë plenare të Forumit Ekonomik Botëror në Davos të Zvicrës, Zelenskyy tha se përfaqësuesit amerikanë kanë pritur të shohin se si do të përfundonte takimi i tij me presidentin e ShBA-së, Donald Trump.

“Tani ata po shkojnë drejt Moskës, dhe ekipi im do të bisedojë me përfaqësuesit amerikanë. Ky do të jetë takimi i parë trepalësh në Emirate, nesër dhe pasnesër. Shpresoj që EBA-ja të jetë në dijeni, sepse amerikanët në përgjithësi pëlqejnë t’i befasojnë të gjithë, por ky takim duhet të zhvillohet”, tha ai.

Lidhur me bisedimet e tij me Trumpin, Zelenskyy tha se takimi “ishte i mirë” dhe se dokumentet për përfundimin e luftës janë pothuajse të finalizuara.

“Shpresoj me të vërtetë që rusët të jenë të gatshëm për kompromise, sepse nuk është vetëm pala ukrainase ajo që duhet të jetë e gatshme për kompromise”, shtoi ai.

Zelenskyy nuk dha detaje të mëtejshme, si koha apo niveli i delegacioneve, por tha: “Ndoshta takimi nuk do të ndodhë menjëherë, ndoshta do të duhet të presim. Por, nesër dhe pasnesër kemi planifikuar takime trepalëshe. Kjo është më mirë sesa mungesa e plotë e dialogut”.

Zëdhënësi i Kremlinit, Dmitry Peskov, konfirmoi më herët gjatë ditës se presidenti Vlladimir Putin planifikon të takohet me përfaqësuesit amerikanë të enjten në mbrëmje.

Ndërkohë, i dërguari amerikan Steven Witkoff tha se ai dhe Jared Kushner, dhëndri i Trumpit, do të udhëtojnë drejt Moskës të enjten në mbrëmje dhe më pas do të vazhdojnë drejtpërdrejt për në Abu Dhabi, ku janë planifikuar takime të grupeve të punës.