Kompleksi Savannah River (SRS) i Departamentit Amerikan të Energjisë në Karolinën e Jugut shpalli të mërkurën gjendje emergjente në zonë, pas shpërthimit të një zjarri në Laboratorin Kombëtar Savannah River.
Sipas një deklarate të kompleksit, që ndodhet pranë qytetit Aiken, gjendja e emergjencës u shpall në orën 17:39 sipas kohës lokale (21:39 GMT).
“Në Laboratorin Kombëtar Savannah River u raportua një zjarr, i cili tashmë është shuar. Nuk është raportuar ndotje jashtë objektit të prekur”, thuhet në njoftimin e publikuar në platformën X.
Më herët, SRS kishte njoftuar se në kompleks po zhvillohej një incident që kishte aktivizuar procedurat e reagimit ndaj emergjencave.
Administrata Federale e Aviacionit (FAA) vendosi kufizime të përkohshme të fluturimeve mbi zonë, duke përmendur një “incident bërthamor” në një objekt qeveritar amerikan.
Shkaku i zjarrit, lloji dhe sasia e materialeve që mund të jenë çliruar, si dhe nëse ka pasur persona të lënduar, mbeten ende të panjohura.
Sipas faqes zyrtare të SRS-së, kompleksi Savannah River është një nga objektet kryesore të infrastrukturës së armëve bërthamore të Shteteve të Bashkuara, i cili ka mbështetur misionin strategjik të parandalimit ushtarak të vendit për më shumë se 75 vjet.
