Kompania turke e mbrojtjes Armelsan ka përfunduar me sukses testimet në det të sonarit të ri vendas për zbulimin e minave, Nusrat-1915, dhe tashmë po përgatitet për integrimin e sistemit në flotën e Marinës Turke.

Drejtori i përgjithshëm i Armelsan, Güray Aybar, tha për Anadolu se sonari vendas i montuar në trupin e anijes ka përfunduar fazën e zhvillimit dhe tani po kalon në fazën e integrimit në platformat detare.

“Në fazën e ardhshme, përpjekjet do të përqendrohen fillimisht në integrimin e sistemit në anije dhe në vendosjen e tij në platforma të ndryshme të Marinës Turke, kryesisht në anijet e klasit Engin”, tha ai.

Marina Turke dhe Presidenca e Industrive të Mbrojtjes së Türkiyes (SSB) presin që sistemi të jetë plotësisht operacional në flotë deri në fund të vitit të ardhshëm, pas vendosjes fillestare.

Aybar tha se personeli ushtarak që mori pjesë në testimet e fundit në det deklaroi se Nusrat-1915 ka performancë më të lartë se sonarët e huaj që përdoren aktualisht nga forcat e armatosura turke.

“Me integrimin e Nusrat-1915 do të arrijmë dyfishin e rrezes së zbulimit dhe dyfishin e performancës krahasuar me kapacitetet aktuale”, tha ai.

Sonari i avancuar është në gjendje të zbulojë, gjurmojë dhe klasifikojë me saktësi një gamë të gjerë kërcënimesh detare nga distanca të mëdha, përfshirë minat e vendosura në fund të detit, minat me zinxhir dhe minat e tipit manta. Duke ofruar paralajmërim të hershëm dhe klasifikim të objektivave, Nusrat-1915 u mundëson specialistëve të identifikojnë dhe neutralizojnë eksplozivët nënujore pa u ekspozuar ndaj rreziqeve operative.

Aybar theksoi se zhvillimi i kësaj teknologjie me kapacitete vendase është bërë një domosdoshmëri strategjike, për shkak të mjedisit gjithnjë e më të paqëndrueshëm të sigurisë detare në Detin e Zi dhe në Gjirin Persik.

Armelsan po zhvillon gjithashtu një paketë kompakte dhe të integruar sonarësh për mjetet sipërfaqësore pa pilot (USV) dhe dronët autonomë nënujore.

Kjo zgjidhje do t’i pajisë këto platforma me teknologjitë kryesore akustike në një paketë të vetme, duke mundësuar zbulimin, gjurmimin dhe klasifikimin e njëkohshëm të minave detare dhe zhytësve armiqësorë.

Paketa për dronët do të përfshijë një sonar shumë-rrezesh për matjen e thellësisë dhe një sonar për shmangien e pengesave, të cilët do të gjenerojnë të dhëna oqeanografike shumë të detajuara dhe tredimensionale, duke u mundësuar mjeteve autonome të hartëzojnë shtratin e detit dhe të lundrojnë në mënyrë të sigurt mes pengesave nënujore.

Kompania e mbrojtjes Armelsan synon që fillimisht t’ia dorëzojë këto sisteme të avancuara sonarësh pa pilot forcave të armatosura të Türkiyes, përpara se t’i ofrojë ato në tregun ndërkombëtar të eksportit.