Presidenti i ShBA-së, Donald Trump, tha se një “grup” kompanish amerikane do ta blejnë platformën e medias sociale TikTok, pasi është arritur marrëveshje me Kinën që do të parandalojë mbylljen e saj në ShBA.

Trump nuk specifikoi se cilat firma do t’i blejnë operacionet amerikane të platformës së medias sociale nga “ByteDance” me bazë në Kinë, por njoftimi vjen pas përpjekjeve të përsëritura të Trumpit për të vonuar ndalimin e operacioneve të saj në ShBA, ndërsa negociatat vazhdonin.

“Kemi marrëveshje për TikTokun. Kam arritur marrëveshje me Kinën. Do të flas me presidentin Xi të premten për të konfirmuar gjithçka”, u tha Trump gazetarëve në Shtëpinë e Bardhë para se të nisej për në Mbretërinë e Bashkuar.

“Bëmë një marrëveshje shumë të mirë tregtare dhe shpresoj të jetë e mirë për të dy vendet, por një marrëveshje shumë të ndryshme nga ajo që kanë bërë në të kaluarën”, shtoi ai.

Të hënën, Sekretari i Thesarit, Scott Bessent, tha se negociatorët arritën një marrëveshje kornizë për pronësinë e TikTokut, me presidentët Donald Trump dhe Xi Jinping që planifikohet të flasin të premten për të miratuar marrëveshjen.

TikTok përballet me një afat deri më 17 shtator që ByteDance të heqë dorë nga operacionet e saj në SHBA ose të përballet me një ndalim mbarëkombëtar për shkak të shqetësimeve të sigurisë kombëtare në lidhje me ndarjen e mundshme të të dhënave me Pekinin.

Bessent njoftoi gjithashtu plane për negociata shtesë tregtare “brenda rreth një muaji, përsëri në një vendndodhje tjetër”.