Ministri i Jashtëm i Omanit zhvilloi bisedime të ndara me zyrtarët amerikanë dhe iranianë sot, si pjesë e bisedimeve indirekte të ndërmjetësuara nga Omani midis ShBA-së dhe Iranit për rifillimin e një rruge diplomatike, konfirmoi Ministria e Jashtme e vendit.
Konsultimet e veçanta të kryediplomatit Sayyid Badr Hamad Al Busaidi me homologun e tij iranian Abbas Araghchi dhe me Steve Witkoff, përfaqësuesin special të presidentit amerikan për Lindjen e Mesme, “u fokusuan në krijimin e kushteve të favorshme për rifillimin e bisedimeve diplomatike dhe teknike”, tha ministria në rrjetin social amerikan X.
Rëndësia e këtyre diskutimeve u theksua gjithashtu “në dritën e përkushtimit të palëve për të siguruar suksesin e tyre me qëllim arritjen e sigurisë dhe stabilitetit të qëndrueshëm”, shtoi ministria.
Al Busaidi ka riafirmuar përkushtimin e Omanit për ta vazhduar mbështetjen e dialogut dhe për t’ia afruar palët më pranë njëra-tjetrës, si dhe për të punuar me partnerë të ndryshëm për të arritur zgjidhje politike konsensuale që përputhen me qëllimet dhe aspiratat e dëshiruara.
Ai gjithashtu ka shprehur vlerësimin për përpjekjet e vendeve rajonale që i mbështesin këto bisedime, tha ministria.
Gjatë negociatave të sotme, Irani përfaqësohet nga një delegacion i udhëhequr nga Araghchi.
Sipas agjencisë shtetërore iraniane IRNA, Araghchishoqërohet nga Majid Takht-Ravanchi, zëvendësministër për çështjet politike; Esmaeil Baghaei, zëdhënës i ministrisë; Hamid Ghanbari, zëvendësministër për çështjet ekonomike; si dhe diplomatë të tjerë iranianë.
Sipas zyrtarëve amerikanë, Witkoff dhe Jared Kushner, dhëndri i Trump dhe ndihmës jozyrtar, përfaqësojnë Shtetet e Bashkuara në bisedime.
Bisedimet zhvillohen në një kohë kur tensionet midis Uashingtonit dhe Teheranit janë në rritje, të nxitura nga një shtim i pranisë ushtarake amerikane në Gjirin Persik dhe kërcënimet e përsëritura për veprime ushtarake nga presidenti amerikan Donald Trump.
Në ditët e fundit, disa vende të tjera, përfshirë Türkiyen, kanë ndërhyrë dhe ofruar të ndërmjetësojnë midis Teheranit dhe Washingtonit për të zbutur tensionet.
