Gjykata Kushtetuese e Kosovës ka publikuar aktgjykimin e plotë për çështjen e seancës konstituive, duke e konsideruar atë të papërfunduar dhe u ka dhënë 12 ditë afat deputetëve ta finalizojnë procesin, prej ditës së publikimit të plotë të vendimit në faqen e saj.

Kushtetuesja ka konstatuar që me moszgjedhjen e një nënkryetari nga komuniteti serb nuk është konstituuar Kuvendi.

Lidhur me procedurën e ndjekur në procesin e deritanishëm me votimin ndaras të nënkryetarëve të Kuvendit nga komunitetet joshumicë serbe dhe joserbe, Kushtetuesja ka deklaruar se kjo nuk përbën shkelje. Sipas Kushtetueses, deputetët mund të vendosin në vullnetin e tyre për procedurën e votimit në pako apo ndaras.

Gjithashtu, në aktgjykim është thënë se edhe votimi i secilit deputet serb me nga tri raunde votimesh nuk ka qenë shkelje.

"Gjykata rikujton se nga dispozitat kushtetuese, të Rregullores së Kuvendit dhe praktika gjyqësore e Gjykatës nuk rezulton ndonjë obligim i deputetëve për votimin në pako të nënkryetarëve të Kuvendit, qofshin ata që propozohen nga 3 (tri) grupet më të mëdha parlamentare apo komunitetet që nuk janë shumicë. Në këtë kontekst, duke qenë se votimi në pako nuk është shprehimisht i përcaktuar në Kushtetutë, i njëjti mund të realizohet nëse ka dakordim në mes grupeve parlamentare apo deputetëve", thuhet në vendim.

Aktgjykimi i publikuar më 8 tetor i obligon deputetët që të zgjedhin një nënkryetar nga komuniteti serb brenda 12 ditësh. Me vendim të Kushtetueses, secili deputet e ka për obligim të votojë për, kundër ose të abstenojë ndaj propozimeve që duhet të dalin në Kuvend brenda 12 ditësh.

"Gjykata ka parasysh se votimi për 8 (tetë) kandidatët nga radhët e deputetëve të komunitetit Serb ka dështuar nga 3 (tri) herë, ndërsa 2 (dy) kandidate kanë refuzuar kandidaturën. Megjithatë, Gjykata konsideron se kriteri për votimin 3 (tri) herë për të njëjtin kandidat, i përcaktuar si mekanizëm debllokues në pikën IV të Aktgjykimit të Gjykatës në rastet KO193/25 dhe KO196/25, në vetvete nuk mund të bëhet pengesë për konstituimin e Kuvendit, nëse (i) afati 30 (tridhjetë) ditor për konstituimin e Kuvendit nuk ka përfunduar dhe me kusht (ii) që të ketë vullnet të deputetëve të zgjedhur të Kuvendit për ta konstituuar Kuvendin", thuhet më tej.

Më 28 gusht, kryeparlamentari Dimal Basha shpalli të konstituuar Kuvendin e Kosovës pavarësisht moszgjedhjes së një deputeti serb për nënkryetar të Kuvendit.

Lista Serbe dështoi në propozimin për Sllavko Simiqin në tri runde. Pas kësaj, Basha me short mundësoi votimin për çdo deputet të këtij grupi e edhe për deputetin jo të Listës Serbe, Nenad Rashiqin. Por, asnjëri nuk mori votat e mjaftueshme.

Bashkimi Evropian ka kërkuar disa herë formim sa më të shpejtë të institucioneve të reja në Kosovë, por kjo nuk u arrit.

Seanca konstituive nisi më 15 prill dhe nga atëherë ajo nuk ka arritur ta konstituojë Kuvendin dhe ta formojë Qeverinë e re.