Sekretari i Shtetit i ShBA-së, Marco Rubio, ka deklaruar se Uashingtoni do t'i vazhdojë përpjekjet për të ndihmuar në ndërmjetësimin e një zgjidhjeje të negociuar për t'i dhënë fund luftës midis Rusisë dhe Ukrainës.
"Ne kemi provuar dhe do të vazhdojmë të përpiqemi dhe të bëjmë çmos për të lehtësuar një zgjidhje të negociuar deri në fund të asaj lufte", u tha Rubio gazetarëve gjatë një paraqitjeje në Lisbonë me Ministrin e Jashtëm Portugez, Paulo Rangel.
Duke folur në ndalesën e fundit të turneut të tij evropian, Rubio paralajmëroi se lufta ka arritur në një bllokim të rrezikshëm që mund të përfundojë vetëm përmes diplomacisë ose luftimeve të zgjeruara.
Ai paralajmëroi se përpjekjet nga secila palë për të thyer bllokimin ushtarak mund të shkaktojnë një "fushatë sabotimi" në shtetet fqinje anëtare të NATO-s ose sulme më të gjera, duke transformuar me shpejtësi luftimet në një përplasje rajonale shumë më të gjerë dhe më "të rrezikshme".
"Në fund të fundit, ne nuk besojmë se ka një zgjidhje ushtarake për këtë konflikt, për këtë luftë", tha ai, duke i nxitur të dyja palët të afrohen në tryezën e negociatave.
Ndërsa riafirmoi gatishmërinë e Uashingtonit për të ndihmuar bisedimet sa më shpejt të jetë e mundur, Rubio theksoi se ShBA-ja "nuk do të investojnë në procese të pakuptimta nëse nuk mund të përparojnë".
