Drejtori i Komunikimeve i Türkiyes, Burhanettin Duran, hodhi poshtë të mërkurën kritikat e drejtuara nga kryeministri izraelit Benjamin Netanyahu ndaj Türkiyes dhe presidentit Recep Tayyip Erdoğan, duke deklaruar se vendi do të vazhdojë të mbështesë të shtypurit dhe të mbrojë të vërtetën dhe drejtësinë.

Në një deklaratë të publikuar në platformën turke të mediave sociale NSosyal, Duran kritikoi ata që përpiqen t’i japin Türkiyes leksione morali, ndërkohë që përballen me kritika ndërkombëtare për veprimet e tyre, përfshirë vrasjen e dhjetëra mijëra civilëve gjatë dekadave në Gaza dhe Bregun Perëndimor.

“Është një paturpësi e plotë që një administratë dhe një lider, historia e të cilëve është e shënuar nga vrasja e dhjetëra mijëra civilëve gjatë dekadave në Gaza dhe Bregun Perëndimor, nga dënimi i fëmijëve me uri, shkatërrimi i qyteteve dhe shpërfillja e së drejtës ndërkombëtare, të përpiqen t’i japin Türkiyes leksione morali”, tha ai.

Duran iu referua gjithashtu proceseve që po zhvillohen në Gjykatën Ndërkombëtare të Drejtësisë (GjND) lidhur me akuzat për Gazën.

Ai tha se ata që “po gjykohen për akuza për gjenocid në Gaza” po përpiqen të sulmojnë Türkiyen dhe presidentin Erdoğan, sepse ata përfaqësojnë “zërin e të shtypurve”.

Duke i cilësuar akuzat ndaj Türkiyes si “shpifje dhe propagandë”, Duran tha se ato nuk mund të ndryshojnë realitetin.

“Shpifjet e një mentaliteti të dënuar në ndërgjegjen e njerëzimit nuk mund të ndryshojnë as pozicionin e Türkiyes dhe as të vërtetën”, tha ai.

Duran shtoi se nën udhëheqjen e Erdoğanit, Türkiye do të vazhdojë “të jetë zëri i të shtypurve, të mbrojë të vërtetën dhe të qëndrojë kundër padrejtësisë”.

Në një deklaratë të veçantë, zëvendëspresidenti turk Cevdet Yılmaz i cilësoi komentet e Netanyahut ndaj Erdoganit si “akuza dhe shpifje të pabaza”, duke thënë se ato nuk mund të fshehin “gabimet e vetë Izraelit”.

Yılmaz tha se këto deklarata nuk kanë asnjë vlerë “as në sytë tanë dhe as në ndërgjegjen e njerëzimit”.

Ai shtoi se Netanyahu, i cili po përballet me procese gjyqësore lidhur me akuza për gjenocid në një gjykatë ndërkombëtare, po përpiqet të shmangë përgjegjësinë, ndërsa njëkohësisht kontribuon në destabilizimin e rajonit.

Sipas Yılmazit, Türkiye do të vazhdojë të mbrojë të drejtën ndërkombëtare, diplomacinë, paqen dhe të drejtat e të shtypurve, si në nivel rajonal ashtu edhe në atë global.