Shefja e politikës së jashtme e BE-së, Kaja Kallas, i bëri thirrje sot ShBA-së që të përafrohet me politikën e sanksioneve të bllokut kundër Rusisë, duke thënë se presioni i koordinuar nga Uashingtoni dhe partnerët evropianë mund të ndihmojë në përfundimin e luftës në Ukrainë.

Duke folur me gazetarët përpara takimit të Këshillit të Punëve të Jashtme të BE-së në Luksemburg, Kallas tha se përpjekjet për të ushtruar presion ndaj Moskës do të jenë më efektive nëse ShBA-ja do t'i bashkohet BE-së dhe Mbretërisë së Bashkuar në vendosjen e sanksioneve të mëtejshme ndaj Rusisë.

"Do të funksiononte shumë më mirë nëse partnerët tanë nga Mbretëria e Bashkuar dhe nga ShBA-ja do të rreshtoheshin me ne", tha ajo duke shtuar se miratimi i Uashingtonit të projektligjit Graham për Rusinë mund të forcojë ndjeshëm presionin ndaj Moskës.

“Ne mund të bëjmë vërtet presion që Rusia ta përfundojë këtë luftë”, deklaroi Kallas. Ajo tha se sanksionet e kanë privuar Rusinë nga 1 trilion euro (1,1 trilion dollarë), duke shtuar se masat që synojnë të ashtuquajturën flotë hije të vendit po e bëjnë gjithnjë e më të vështirë për Moskën financimin e luftës.

Në lidhje me njoftimin e presidentit të ShBA-së, Donald Trump, për armëpushim energjetik midis Rusisë dhe Ukrainës, Kallas tha se BE-ja e mirëpret marrëveshjen, por duhet të shohë ende nëse Moska do ta respektojë.

Ajo theksoi se armëpushimi duhet të shtrihet përtej infrastrukturës energjetike për të përfshirë "dhënien fund të vrasjes së njerëzve". Kallas vuri në pikëpyetje shtrirjen e marrëveshjes, duke thënë se Ukraina ka një rafineri ndërsa Rusia kishte disa dhe se armëpushimi nuk duhet t‘i sjellë dobi Moskës.

Në thirrjen e Trumpit për zgjedhje të reja në Ukrainë, ajo kujtoi se presidenti ukrainas Volodymyr Zelenskyy ka treguar gatishmërinë e tij për të mbajtur zgjedhje sa më shpejt të jetë e mundur nëse vendoset armëpushim.

Lindja e Mesme

Duke iu kthyer zhvillimeve në Lindjen e Mesme, Kallas dënoi sulmet e përshkallëzuara të Huthive në aeroporte. Ajo tha se ministrat e BE-së do të diskutojnë se çfarë masash të mëtejshme mund të merren për të adresuar situatën në Detin e Kuq.

Kallas shtoi se ajo ka biseduar me ministrin e Jashtëm saudit, Princin Faisal bin Farhan Al Saud një ditë më parë, gjatë së cilës u diskutua mundësia e forcimit të operacionit "Aspides" të BE-së.

Kryediplomatja evropiane tha se ministrat e Jashtëm të BE-së do të diskutojnë për krijimin e një misioni të ri në Liban, i cili përbëhet nga komponentë civilë dhe ushtarakë. Ajo shprehu shpresën se nëse miratohet, misioni do të jetë gati për të filluar operacionet në terren brenda pak muajsh.