Autoritetet franceze arrestuan 1.314 persona gjatë demonstratave mbarëkombëtare të së shtunës, ndërsa 53 pjesëtarë të forcave të sigurisë mbetën të plagosur, njoftoi të dielën Ministria e Brendshme.
Sipas televizionit BFMTV, këto shifra shënojnë një rënie të ndjeshme krahasuar me ditën e parë të mobilizimit, më 17 tetor, kur u arrestuan 2.628 persona dhe u plagosën 1.144 pjesëtarë të forcave të sigurisë.
Sipas ministrisë, në demonstratat e së shtunës morën pjesë 410 mijë persona në të gjithë Francën, përfshirë 110 mijë në Paris.
Megjithatë, sindikatat vlerësuan se pjesëmarrja në nivel kombëtar arriti në afro 800 mijë persona, nga të cilët 250 mijë protestuan në kryeqytet.
Ministria njoftoi se gjatë demonstratave u plaçkitën 24 biznese, krahasuar me 1.522 një javë më parë, duke shënuar një rënie prej më shumë se 98 për qind.
Gjithashtu, u raportuan 75 ndërhyrje të lidhura me zjarret, krahasuar me 2.025 më 17 tetor.
Ministri i Brendshëm, Laurent Nunez, e cilësoi rezultatin e përgjithshëm të demonstratave të së shtunës si pozitiv, duke deklaruar se masat e sigurisë kishin ndihmuar në parandalimin e plaçkitjeve në shkallë të gjerë dhe dëmtimit të ndërtesave publike.
Arrestime dhe incidente në Marsejë dhe Paris
Në Marsejë, gjatë demonstratës së së shtunës u arrestuan 71 persona, përfshirë 40 të rritur.
Gjithsej 61 persona u mbajtën në paraburgim policor, ndërsa shtatë biznese u plaçkitën ose u vandalizuan.
Kryebashkiaku i Marsejës, Benoît Payan, e cilësoi demonstratën si “paqësore”, pavarësisht disa incidenteve të vogla në fund të marshimit.
Ai tha se situata ishte dukshëm më e qetë krahasuar me protestat e 17 tetorit, kur disa biznese në qytet u plaçkitën.
Në Paris, u arrestuan 142 persona, prej të cilëve 126 u mbajtën në paraburgim policor, njoftoi Prefektura e Policisë së Parisit.
Dy biznese u dëmtuan, njëri prej të cilëve u plaçkit gjithashtu, ndërsa policia pengoi hyrjen e protestuesve në një tjetër objekt tregtar.
Ndërkohë, një person pësoi lëndime të rënda në dorë gjatë demonstratës në Clermont-Ferrand, megjithëse autoritetet thanë se nuk kishte humbje të gishtërinjve.
Një person tjetër u plagos rëndë në dorë gjatë një demonstrate në Toulouse.
