Një ekspert i njohur i mjekësisë emergjente ka bërë të ditur se Türkiye po zgjeron vendosjen e defibrilatorëve të jashtëm automatikë (AED), të zhvilluar në vend, në hapësirat publike me frekuentim të lartë në të gjithë vendin, me qëllim rritjen e mundësive për mbijetesë të personave që pësojnë arrest të papritur kardiak.
Presidenti i Shoqatës Turke të Mjekësisë Emergjente, Bulent Erbil, për Anadolu tha se pajisjet, të zhvilluara nga inxhinierë turq në bashkëpunim me Ministrinë e Shëndetësisë dhe kompaninë e mbrojtjes ASELSAN, po instalohen në hapësira publike në disa provinca të vendit.
Duke folur gjatë një vizite në provincën veriperëndimore të Edirnesë, Erbil, i cili shërben gjithashtu si kryemjek i Spitalit për të Rritur të Universitetit Hacettepe, theksoi rëndësinë e ndërhyrjes së menjëhershme kur një personi i ndalet zemra dhe frymëmarrja.
Ai tha se fillimisht duhet të kontaktohen shërbimet e emergjencës duke telefonuar në numrin 112, ndërsa personat e pranishëm duhet t'i kërkojnë dikujt të sjellë defibrilatorin më të afërt dhe të fillojnë reanimimin kardiopulmonar (CPR).
"Kur defibrilatorët automatikë ndizen menjëherë dhe vendosen në trupin e pacientit, mundësitë e tij për mbijetesë rriten nëse ritmi normal i zemrës mund të rikthehet", tha ai.
Erbil theksoi se shkalla e mbijetesës mund të arrijë në 90 për qind kur persona të trajnuar ndërhyjnë me defibrilator brenda minutave të para, por se mundësitë për mbijetesë ulen nga 7 për qind deri në 10 për qind për çdo minutë vonesë.
Ai theksoi se pajisjet duhet të vendosen kudo ku mblidhen një numër i madh njerëzish, përfshirë terminalet e transportit, avionët, trenat, universitetet, shkollat dhe vendet e mëdha të punës.
Erbil tha se Ministria e Shëndetësisë kishte nisur një nismë gjithëpërfshirëse për zgjerimin e qasjes në defibrilatorë, pas rregulloreve të miratuara rreth një vit më parë.
Ai shtoi se universitetet kanë marrë rolin udhëheqës duke i instaluar pajisjet në kampuset e tyre, ndërsa edhe komunat e kanë mbështetur këtë përpjekje.
Ai po ashtu tha se ministria fillimisht u përqendrua në qytetet e mëdha, përpara se të zgjeronte instalimin e pajisjeve edhe në vende të tjera.
"Ky është një zhvillim shumë pozitiv për vendin tonë dhe jemi shumë të kënaqur. Si Shoqatë Turke e Mjekësisë Emergjente, ne e mbështesim këtë nismë", tha Erbil.
Ai shtoi se shoqata ofron trajnime për përdorimin e defibrilatorëve dhe ka përgatitur video edukative përmes Komisionit të saj të Shëndetit Publik, të cilat janë të qasshme për të gjithë të interesuarit.























