Organizata Ndërkombëtare e Aviacionit Civil (ICAO) ka tërhequr një paralajmërim sigurie lidhur me hapësirën ajrore siriane, i cili ishte në fuqi për më shumë se 13 vjet, njoftoi Autoriteti i Aviacionit Civil i Sirisë. 

Omar al-Hosari, kreu i Autoritetit të Përgjithshëm të Aviacionit Civil dhe Transportit Ajror të Sirisë, tha se tërheqja shënon një hap të rëndësishëm drejt riintegrimit të hapësirës ajrore siriane në rrjetin ndërkombëtar të aviacionit, raportoi Agjencia Arabe Siriane e Lajmeve (SANA).

Ai tha se ICAO kishte konfirmuar se paralajmërimi i mëparshëm, i lëshuar në vitin 2013, nuk do të shërbejë më si bazë për vendimet operacionale lidhur me hapësirën ajrore siriane.

Në vend të tij, vlerësimet e rrezikut do të bazohen në standardet e përditësuara ndërkombëtare të sigurisë dhe mbrojtjes së aviacionit, shtoi ai.

Al-Hosari tha se ky zhvillim do t'u mundësojë vendeve, autoriteteve të aviacionit civil dhe linjave ajrore ndërkombëtare t'i rivlerësojnë vendimet e tyre lidhur me fluturimet që kalojnë mbi hapësirën ajrore siriane, si dhe ato që mbërrijnë në aeroportet siriane dhe nisen prej tyre.

Ai tha se kjo masë mund të ndihmojë në rritjen e trafikut të fluturimeve tranzit dhe të nxisë më shumë linja ajrore ndërkombëtare ta shqyrtojnë rifillimin e operimeve drejt Sirisë.

Megjithatë, ai theksoi se tërheqja e paralajmërimit nuk do t'i heqë automatikisht kufizimet operacionale të vendosura nga vende të veçanta ose rregullatorë të aviacionit.

Ai tha se vendimi do të mbështesë përpjekjet e vazhdueshme teknike dhe diplomatike për trajtimin e këtyre kufizimeve, bazuar në vlerësimet e sigurisë dhe mbrojtjes së aviacionit të njohura ndërkombëtarisht.

Autoriteti sirian i aviacionit vazhdon të bashkërendojë punën me ICAO-n dhe autoritetet ndërkombëtare të aviacionit civil për ta forcuar besimin në sigurinë e operimeve të fluturimeve dhe për të zgjeruar lidhjet me tregjet rajonale dhe ndërkombëtare, shtoi ai.

Paralajmërimi fillestar i ICAO-s, i datës 22 mars 2013, kishte të bënte me sigurinë e avionëve civilë që operonin në rajonin e informacionit të fluturimit të Damaskut.

Ndërkohë, Agjencia e Bashkimit Evropian për Sigurinë e Aviacionit (EASA) vazhdon ta mbajë në fuqi një buletin informues për zonat e konfliktit lidhur me hapësirën ajrore siriane. Buletini u rishikua më 1 tetor dhe mbetet i vlefshëm deri më 30 nëntor 2026.

Siria i kishte rihapur më parë korridoret e saj ajrore dhe kishte rifilluar operimet e fluturimeve në Aeroportin Ndërkombëtar të Damaskut në prill, pas mbylljeve të përkohshme të lidhura me tensionet rajonale.

Al-Hosari tha se rikthimi i rolit të Sirisë në navigimin ajror ndërkombëtar mbetet një përparësi strategjike, duke e përmendur potencialin e tij për të rritur trafikun ajror dhe për ta mbështetur aktivitetin ekonomik dhe investimet në sektorin e aviacionit civil të vendit.