Dmitry Medvedev, nënkryetar i Këshillit të Sigurisë të Rusisë, paralajmëroi të shtunën se Moska nuk do të tolerojë praninë e trupave evropiane apo të NATO-s në Ukrainë, duke akuzuar liderët evropianë se po kërkojnë një konflikt më të gjerë dhe duke kërcënuar me pasoja të rënda nëse plane të tilla zbatohen.

Medvedev reagoi ashpër kundrejt diskutimeve të fundit mbi dislokimin e mundshëm të forcave perëndimore në Ukrainë.

“Budallenjtë që qeverisin Evropën duan një luftë në Evropë, në fund të fundit. Është thënë një mijë herë: Rusia nuk do të pranojë asnjë trupë evropiane apo të NATO-s në Ukrainë, por jo, ‘Micron’ vazhdon të shesë këto marrëzira patetike”, tha Medvedev në një deklaratë në X, duke përdorur një nofkë përçmuese për presidentin francez Emmanuel Macron.

“Mirë pra, hajdeni atëherë. Ja çfarë do të merrni”, shtoi ai, duke bashkëngjitur pamje të një goditjeje në Ukrainën perëndimore me sistemin Oreshnik.

Deklaratat e Medvedevit erdhën pasi Macron dhe liderë të tjerë evropianë kanë diskutuar së fundmi krijimin e një “Koalicioni të të Vullnetshmëve” për zhvendosjen e mundshme të trupave për misione paqeruajtëse ose për garanci sigurie pas një armëpushimi të ardhshëm.

Franca dhe Mbretëria e Bashkuar nënshkruan më herët këtë javë një deklaratë qëllimi për dislokimin e forcave në Ukrainë në rast të një marrëveshjeje paqeje, një hap që, sipas tyre, është i domosdoshëm për garantimin e stabilitetit.

Moska ka deklaruar vazhdimisht se çdo prani ushtarake e huaj në Ukrainë do të shihet si një kërcënim i drejtpërdrejtë dhe si objektiv legjitim.