ShBA-ja vendos sanksione ndaj të afërmve të Maduros dhe kompanive të transportit

Departamenti i Thesarit të ShBA-së ka vendosur sanksione të reja ndaj tre të afërmve të liderit venezuelian Nicolas Maduro si dhe gjashtë kompanive që transportojnë naftën e vendit.
Vendimi erdhi të enjten, teksa Shtëpia e Bardhë tha se do ta sjellë në një port amerikan cisternën e naftës të sekuestruar nga forcat amerikane pranë brigjeve të Venezuelës, duke shtuar frikën në rritje për një konflikt të hapur midis dy vendeve.

Uashingtoni mori kontrollin e anijes në një operacion dramatik, ku forcat amerikane zbritën me litarë nga një helikopter mbi bord, një operacion që Sekretarja e Sigurisë Kombëtare, Kristi Noem, e përshkroi si të drejtuar kundër “regjimit” të Maduros.

Zyrtarët e Thesarit thanë se tre nipër të gruas së Maduros, Cilia Flores, po sanksionoheshin, duke i cilësuar dy prej tyre si “narko-trafikantë që operojnë në Venezuelë”.

“Nicolas Maduro dhe bashkëpunëtorët e tij kriminalë po e përmbytin Amerikën me drogë që helmon popullin amerikan,” tha Sekretari i Thesarit, Scott Bessent.

Sekuestrohen anijet venezueliane

Administrata e presidentit Donald Trump ka ushtruar presion mbi Venezuelën për muaj të tërë me një grumbullim të madh detar në rajon, shoqëruar me sulme ndaj varkave të supozuara të trafikut të drogës, të cilat kanë vrarë gati 90 persona.

Presidenti rus Vladimir Putin të enjten shprehu mbështetje gjatë një bisede telefonike me aleatin e tij Maduro, por me forcat ruse të përfshira në një luftë të gjatë në Ukrainë, aftësia e Moskës për të ofruar ndihmë është e kufizuar.

“Anija do të shkojë në një port amerikan dhe ShBA synon të sekuestrojë naftën,” u tha gazetarëve Sekretarja e Shtëpisë së Bardhë, Karoline Leavitt.
“Ne nuk do të rrimë duarkryq dhe të shohim anije të sanksionuara që lundrojnë me naftë të tregut të zi, fitimet e së cilës ushqejnë narko-terrorizmin e regjimeve të paligjshme.”

Më herët të enjten, Noem tha para Kongresit se operacioni për cisternën ishte “shtytje kundër një regjimi që po mbulon sistematikisht dhe po përmbyt vendin tonë me droga vdekjeprurëse”, një referencë ndaj akuzave amerikane për kontrabandë narkotikësh nga qeveria e Maduros.

Një video e publikuar të mërkurën nga Prokurorja e Përgjithshme e ShBA-së, Pam Bondi, tregoi forcat amerikane duke zbritur nga helikopteri në kuvertën e anijes, dhe më pas duke hyrë në kabinën e komandimit me armë të ngritura.

Bondi tha se anija ishte pjesë e një “rrjeti të paligjshëm transporti të naftës”.

“Vjedhje e hapur”

Ministria e Jashtme e Venezuelës tha se “dënon dhe refuzon fuqishëm atë që përbën vjedhje të hapur dhe akt piraterie ndërkombëtare.”
“Ata rrëmbyen ekuipazhin, vodhën anijen dhe kanë inauguruar një epokë të re, epokën e piraterisë detare kriminale në Karaibe,” tha Maduro, duke shtuar: “Venezuela do t’i sigurojë të gjitha anijet për të garantuar tregtinë e lirë të naftës së saj në mbarë botën.”

Sekretari i Përgjithshëm i OKB-së, Antonio Guterres, të enjten shprehu shqetësim për tensionet në rritje dhe bëri thirrje për përmbajtje.
“Ne u kërkojmë të gjitha palëve të përmbahen nga veprimet që mund të përshkallëzojnë tensionet dypalëshe dhe të destabilizojnë Venezuelën dhe rajonin,” tha zëdhënësi i tij.

Mediat amerikane raportuan se cisterna po shkonte drejt Kubës, një tjetër rival i ShBA-së, dhe se anija u ndalua nga Roja Bregdetare e ShBA-së.

Senatori Dick Durbin, demokrati kryesor në Komitetin e Gjyqësorit, tha se dyshonte për ligjshmërinë e sekuestrimit dhe se “çdo president, përpara se të ndërmarrë një akt lufte, duhet të ketë autorizimin e popullit amerikan përmes Kongresit”.

“Ky president po përgatitet për një pushtim të Venezuelës, thënë thjesht. Dhe do të habitesha nëse populli amerikan do ta mbështeste këtë,” i tha Durbin CNN-it.

SHBA ka akuzuar Maduros për drejtimin e të ashtuquajturit “Karteli i Diellit”, të cilin muajin e kaluar e shpalli “organizatë narko-terroriste”, dhe ka ofruar 50 milionë dollarë shpërblim për informacion që çon në kapjen e tij.

Trump i tha Politico të hënën se “ditët e Maduros janë të numëruara” dhe nuk përjashtoi një pushtim tokësor të Venezuelës nga SHBA.

Maduro — trashëgimtari politik i liderit të majtë Hugo Chavez — thotë se Shtetet e Bashkuara synojnë ndryshimin e regjimit dhe duan të marrin kontrollin e rezervave të naftës së Venezuelës.