Disa mijëra protestues u mblodhën në Berlin të Gjermanisë, duke kërkuar dorëheqjen e kancelarit Friedrich Merz mes thirrjeve nacionaliste, sloganeve kundër migracionit dhe shfaqjes së simboleve të ekstremit të djathtë.

Policia vlerësoi se deri në mesditën e së hënës në protestë morën pjesë rreth 4.000 persona, megjithëse organizatorët kishin regjistruar deri në 10.000 pjesëmarrës.

Autoritetet thanë se rreth 700 efektivë policie u angazhuan për të monitoruar demonstratën.

Protestuesit, shumë prej tyre me flamuj gjermanë në duar, mbanin pankarta me mbishkrimet: “Qeveria të japë dorëheqjen”, “Merz duhet të largohet”.

Të tjerë mbanin pankarta ku akuzonin qeverinë se po injoron shqetësimet e qytetarëve dhe kundërshtonin planet e saj të reformave dhe taksat e lidhura me klimën.

“Ne jemi populli”, brohoritën protestuesit, një slogan historik që vitet e fundit është përvetësuar nga lëvizje populiste të ekstremit të djathtë.

Demonstrata u organizua nga një nismë që e quan veten “Projekt M1llion”, e cila bëri thirrje për “demokraci të drejtpërdrejtë” dhe promovoi një plan me 11 pika, ku përfshiheshin kërkesat për ndalimin e migracionit, deportimin e menjëhershëm të të gjithë personave të dënuar dhe migrantëve pa dokumente, ndalimin e reformave aktuale në shëndetësi dhe heqjen e tarifës së detyrueshme për transmetuesit publikë.

Kancelari Friedrich Merz, një konservator që drejton një qeveri koalicioni me Socialdemokratët e qendrës së majtë, i ka refuzuar publikisht thirrjet për zgjedhje të parakohshme.

Ai argumentoi se paqëndrueshmëria politike do të kishte një kosto shumë të lartë për ekonominë më të madhe të Evropës.

Megjithatë, sondazhet e fundit tregojnë pakënaqësi të thellë publike ndaj performancës së kancelarit.

Sipas një sondazhi të institutit Forsa, i kryer nga 26 maji deri më 1 qershor, 85 për qind e të anketuarve thanë se janë të pakënaqur me punën e Merzit deri më tani, ndërsa vetëm 13 për qind shprehën miratim.