Qeveria jemenase tha të martën se rreth 12.600 familje janë zhvendosur në gjashtë provinca gjatë valës së fundit të zhvendosjeve, mes përshkallëzimit ushtarak në vend.

Ministri jemenas i Planifikimit dhe Bashkëpunimit Ndërkombëtar, Mohammed Al-Baqmi, tha gjatë një takimi me ministren e Jashtme Afrah Al-Zouba dhe përfaqësues të OKB-së, të organizatave ndërkombëtare dhe të organizatave joqeveritare se 12.597 familjet e zhvendosura përballen me nevoja urgjente për strehim, ushqim dhe ujë të pijshëm të sigurt.

Al-Baqmi bëri thirrje për veprime të menjëhershme ndërkombëtare për mobilizimin e burimeve dhe për adresimin e mungesave të financimit në reagimin humanitar, sipas agjencisë shtetërore të lajmeve të Jemenit, Saba.

Ndërkohë, autoritetet lokale në kryeqytetin e përkohshëm Aden njoftuan se guvernatori Abdulrahman Sheikh ka marrë vendim për krijimin e një celule për reagim humanitar, për të adresuar nevojat e krijuara nga përshkallëzimi ushtarak dhe valët e zhvendosjeve drejt qytetit.

Sipas autoriteteve lokale, celula do të vlerësojë nevojat e personave të zhvendosur nga bregu perëndimor dhe Taizi dhe do të punojë për ofrimin e ndihmës brenda burimeve në dispozicion.

Jemeni kishte përjetuar një periudhë qetësie relative që nga prilli 2022, pas gati 12 vitesh luftë mes forcave qeveritare, të mbështetura nga një koalicion i udhëhequr nga Arabia Saudite, dhe Huthive të mbështetur nga Irani, të cilët morën kontrollin e kryeqytetit Sana dhe pjesëve të mëdha të vendit në vitin 2014.

Që nga fundi i vitit 2023, pas fillimit të luftës në Gaza, Huthit janë përfshirë gjithnjë e më shumë në konfliktet rajonale, duke ndërmarrë sulme ndaj Izraelit dhe anijeve tregtare në Detin e Kuq, ndërsa rifillimi i luftimeve kohët e fundit ka rritur frikën për rikthimin e një konflikti në shkallë të gjerë në Jemen.