Franca ka konstatuar një operacion ndërhyrjeje ruse që synonte ta lidhte presidentin Emmanuel Macron me çështjen e të ndjerit abuzues seksual Jeffrey Epstein, sipas burimeve qeveritare të cituara nga transmetuesi BFMTV.

Operacioni i ndërhyrjes thuhet se lidhet me një rrjet rus të quajtur “Storm-1516”, përmes një lajmi të cilësuar si i rremë nga llogaria French Response e Ministrisë së Jashtme franceze në platformën X.

Një llogari me emrin “Loetitia Halasz” pretendonte se Macron ishte “mysafir i shpeshtë” në rezidencën e Epsteinit në Paris, duke u mbështetur veçanërisht në një artikull që i atribuohej medias France Soir, e cila më pas e mohoi pretendimin, duke e quajtur “imitim të markës dhe përmbajtjes”.

“Rezulton se Loetitia pretendon se zotëron sekrete botërore. Rezulton se inteligjenca artificiale i shndërron ato në imazhe. Rezulton se artikulli i France Soir nuk ekziston. Rezulton se rrjetet ruse po e amplifikojnë drejtpërdrejt”, thuhet në reagimin e French Response, duke hedhur poshtë pretendimet e llogarisë.

BFMTV thekson se, ndonëse emri i Macronit përmendet më shumë se 200 herë në dosjet e Epsteinit të publikuara së fundmi, ai shfaqet vetëm në diskutime që lidhen me persona të tjerë ose në artikuj të shtypit, dhe se aktualisht nuk ka asnjë provë për ndonjë shkëmbim apo takim mes presidentit francez dhe Epsteinit.

Departmenti amerikan i Drejtësisë publikoi së fundmi më shumë se 3 milionë faqe, 2.000 video dhe 180.000 imazhe që lidhen me Epsteinin, në kuadër të Aktit për Transparencën e Dosjeve Epstein, të nënshkruar në ligj nga presidenti amerikan Donald Trump në nëntor.

Materialet përfshijnë fotografi, transkripte të jurive të mëdha dhe dokumente hetimore, megjithëse shumë faqe mbeten ende të redaktuara rëndë.

Epstein u gjet i vdekur në një burg të qytetit të Nju Jorkut në vitin 2019, teksa priste gjyqin për akuza federale për trafikim seksual me vajza të mitura.