BE-ja bie dakord të ndalojë importet e gazit rus deri në vitin 2027

Këshilli Evropian dhe Parlamenti Evropian ranë dakord të mërkurën për një marrëveshje të përkohshme për të ndërprerë gradualisht importet e gazit natyror rus deri në vitin 2027.

“Rregullorja prezanton një ndalim të detyrueshëm ligjor, me faza, të importeve të gazit të lëngshëm (LNG) dhe gazit përmes tubacioneve nga Rusia, me një ndalim të plotë deri në fund të vitit 2026 për LNG-në dhe deri në vjeshtën e vitit 2027 për gazin me tubacione”, shpjegoi një deklaratë e Këshillit.

Marrëveshja e përkohshme synon krijimin e një tregu energjetik të BE-së “të qëndrueshëm” dhe “të pavarur”.

“Bashkëligjvënësit konfirmuan se importet e gazit rus përmes tubacioneve dhe LNG–ja do të ndalohen gjashtë javë pas hyrjes në fuqi të rregullores, duke ruajtur ndërkohë një periudhë tranzicioni për kontratat ekzistuese”, thuhet më tej në deklaratë.

Rregullorja kërkon që të gjitha shtetet anëtare të paraqesin plane kombëtare të diversifikimit, ku të detajojnë se si do të diversifikojnë furnizimet me gaz dhe çfarë sfidash parashikojnë, me synimin për t’i dhënë fund të gjitha importeve të gazit rus brenda afateve të përcaktuara.

“Në të njëjtën kohë, marrëveshja forcon mbikëqyrjen e Komisionit duke kërkuar që shtetet anëtare ta njoftojnë Komisionin brenda një muaji nga hyrja në fuqi e rregullores nëse kanë kontrata furnizimi me gaz rus apo ndalim ligjor kombëtar në fuqi”, shtohet në deklaratë.

Këshilli dhe Parlamenti ruajtën gjithashtu “klauzolën e pezullimit”, e cila lejon që rregullorja të pezullohet përkohësisht nëse ngjarje të papritura kërcënojnë furnizimin me energji të një ose më shumë shteteve anëtare.

Rregullat se kur Komisioni mund të heqë ndalimin e importit janë forcuar, duke e kufizuar vetëm në raste rreptësisht të domosdoshme, në situatat kur një shtet anëtar ka shpallur emergjencë dhe vetëm për një periudhë të shkurtër dhe për kontrata afatshkurtra furnizimi.

Marrëveshja e përkohshme pret tani miratimin nga Këshilli dhe Parlamenti, përpara se të miratohet zyrtarisht.