Kryeministri armen, Nikol Pashinyan, ka deklaruar se vendi i tij nuk do t'i bashkohet NATO-s.
Duke folur gjatë një seance pyetje-përgjigjesh në parlament, në kryeqytetin Jerevan, Pashinyan tha se nuk e nënshkroi kartën që përcakton parimet kryesore të sigurisë evropiane në samitin e Komunitetit Politik Evropian në Dublin, për shkak të referencave ndaj NATO-s.
"Ne nuk u bashkuam për një arsye të vetme, të cilën ua bëra të qartë partnerëve tanë, dokumenti përmbante referenca të shumta ndaj NATO-s. Unë tashmë e kam shprehur qartë qëndrimin tonë, po, kemi nisur procesin e anëtarësimit në BE, por politika jonë nuk përfshin asnjë vendim për t'u anëtarësuar në NATO apo për të ndjekur një synim të tillë", tha ai.
Kryeministri armen tha se Jerevani e konsideronte të pranueshme pjesën më të madhe të përmbajtjes tjetër të kartës, por nuk do të ndiqte një politikë të anëtarësimit në aleancën ushtarake.
Ai shtoi se partnerët evropianë të Armenisë e kishin kuptuar qëndrimin e saj.
Më 13 nëntor, rreth 40 vende nënshkruan kartën në samitin e Komunitetit Politik Evropian në Dublin. Dokumenti përcakton ato që nënshkruesit i cilësojnë si parime kryesore të sigurisë evropiane.























