Sekretari amerikan i Shtetit, Marco Rubio, deklaroi të martën se Uashingtoni dhe Teherani ende nuk i kanë përfunduar bisedimet për kalimin nëpër rrugët kryesore ujore ndërkombëtare, por shpreson që një marrëveshje të arrihet “shumë shpejt”.

Pas raportimeve dhe deklaratave të zyrtarëve të lartë amerikanë se palët janë pranë një marrëveshjeje për rihapjen e Ngushticës së Hormuzit, Rubio u tha gazetarëve në Departamentin e Shtetit se “është arritur përparim në këto bisedime, por ende nuk ka një rezultat përfundimtar”.

“Shpresojmë që kjo të ndodhë shumë shpejt”, tha ai.

Duke pretenduar se disa anije tregtare kanë arritur të kalojnë pavarësisht përpjekjeve për ta penguar lëvizjen e tyre, Rubio tha se “po zhvillohet një dialog dhe një proces negociator, në të cilin jemi të përfshirë, mes Omanit dhe Iranit, për mënyrën se si më shumë anije mund të kalojnë të sigurta në një periudhë afatshkurtër”.

“Nafta po kalon aktualisht përmes ngushticave. Pra, ngushticat janë të hapura”, tha ai, duke iu referuar me sa duket Ngushticës së Hormuzit dhe rrugës ujore Bab el-Mandeb mes Jemenit dhe Bririt të Afrikës, pasi grupi Huthi i Jemenit kërcënoi anijet e lidhura me portet e Arabisë Saudite.

Bab el-Mandebi, mes Jemenit dhe Bririt të Afrikës, lidh Gjirin e Adenit me Detin e Kuq dhe shërben si një rrugë kryesore për anijet që udhëtojnë mes Azisë, Lindjes së Mesme dhe Evropës përmes Kanalit të Suezit.

Më herët të martën, sekretari amerikan i Thesarit, Scott Bessent, tha se bisedimet me Iranin për Ngushticën e Hormuzit po vazhdonin dhe se një marrëveshje për rihapjen e kësaj rruge strategjike ujore mund të arrihej të martën ose të mërkurën.

Rubio tha se marrëveshja e mundshme për ngushticat po merrte më shumë vëmendje, por ShBA-ja synonte të siguronte një “marrëveshje përfundimtare” me Iranin për çarmatimin bërthamor.