Komandanti i KFOR-it, Ozkan Ulutas ka vlerësuar se situata e sigurisë në Kosovë është aktualisht e qëndrueshme, por stabiliteti afatgjatë varet nga diplomacia dhe jo nga dhuna.

Në një intervistë për një televizion lokal, gjenerali Ulutas theksoi se NATO mbështet fuqimisht dialogun midis Beogradit dhe Prishtinës nën kujdesin e Bashkimit Evropian (BE) si e vetmja kornizë për zgjidhjen e çështjeve të pazgjidhura.

"Situata e sigurisë në Kosovë është aktualisht e qëndrueshme. Mandati im i parë si kryetar i misionit të KFOR-it erdhi menjëherë pas incidenteve të rënda të sigurisë në veri të Kosovës në vitin 2023 dhe rritjes së mëvonshme të pranisë së KFOR-it në terren. Që atëherë, nuk kemi parë një përsëritje të dhunës me atë intensitet. Megjithatë, ne mbetemi vigjilentë dhe të vendosur në mënyrë adekuate", tha Ulutas.

Ai u bëri thirrje të gjitha palëve që të angazhohen në mënyrë konstruktive në dialogun nën kujdesin e BE-së, sepse theksoi se "rruga drejt stabilitetit të qëndrueshëm është politike, jo ushtarake".

Komandanti i KFOR-it theksoi se situata në veri të Kosovës është aktualisht e qetë, por ende jo plotësisht e stabilizuar. Ai tha se procesi i dorëzimit të detyrës mes kryetarëve të vjetër dhe të rinj të komunave në veri ka kaluar pa incidente, ndërsa KFOR-i vazhdon të ofrojë kornizë sigurie për vazhdimin e dialogut politik.

Ulutas shtoi se KFOR-i do të vazhdojë të zbatojë mandatin e tij për të garantuar siguri për të gjitha komunitetet në Kosovë, duke ruajtur praninë në terren dhe kontaktet me të gjithë aktorët relevantë.