Organizimi i Samitit të OKB-së për klimën COP31 nga Türkiye do të ofrojë mundësi të rëndësishme për të ndarë me bashkësinë ndërkombëtare vizionin e vendit për diplomacinë klimatike, tha kreu i Komunikimeve, Burhanettin Duran.

"COP31, që do të mbahet në Antalya nga 9 deri më 20 nëntor, është një mundësi e rëndësishme për vendin tonë që të ndajë me bashkësinë ndërkombëtare vizionin e tij në fushën e diplomacisë klimatike", tha Duran në një panel me titull "Nga Mbetje zero te COP31: Diplomacia klimatike e Türkiyes", të mbajtur në Drejtorinë e Komunikimeve.

Duran tha se sfidat klimatike, përfshirë humbjen e biodiversitetit, ndotjen e oqeaneve, shkretëtirëzimin, problemet me ujin, ngrohjen globale dhe menaxhimin e mbetjeve, prej kohësh e kanë tejkaluar kapacitetin e vendeve individuale për t'i trajtuar ato vetëm me burimet e tyre kombëtare.

"Diplomacia klimatike është një koncept që e përdorim pikërisht për këtë arsye", tha ai duke shtuar se politikat qeveritare mund të marrin kuptim vetëm përmes negociatave ndërkombëtare, bashkëpunimit dhe angazhimeve të përbashkëta.

Duran tha se një libër për diplomacinë klimatike, i përgatitur nga Drejtoria e Komunikimeve, synon të bashkojë përvojën, përpjekjet dhe vizionin e Türkiyes në këtë fushë si dhe të kontribuojë në hartimin e politikave dhe në punën e mëtejshme.

Njohuritë shkencore "duhet të pasqyrohen pozitivisht edhe në proceset e vendimmarrjes politike"

Duke theksuar se pasojat e krizës klimatike tashmë po ndihen, Duran tha se politikat ndërkombëtare duhet të vendosin një ekuilibër mes të drejtave sovrane të vendeve dhe përgjegjësive të tyre globale.

Ai tha se nga vendet me përgjegjësi më të madhe për ndryshimet klimatike pritet të krijojnë kapacitete më të mëdha për transferimin e teknologjisë dhe financimin e klimës ndërsa nevojitet një kuadër i drejtë negociatash për të pajtuar interesat kombëtare.

"Njohuritë shkencore nuk mjaftojnë. Ato duhet të pasqyrohen pozitivisht edhe në proceset e vendimmarrjes politike", tha ai.

Duran iu referua përshkrimit të ndryshimeve klimatike nga shkencëtari politik, Joseph Nye si një "shumëzues i kërcënimeve", dhe jo thjesht si një krizë ekologjike, duke thënë se kjo çështje lidhet drejtpërdrejt me drejtësinë dhe barazinë globale.

Ai argumentoi se konfliktet në pjesë të ndryshme të botës kanë pasoja të rënda mjedisore dhe klimatike. "Sulmet e paligjshme të Izraelit ndaj Gazës jo vetëm që kërcënojnë jetën e njerëzve, por edhe e thellojnë krizën klimatike përmes emetimeve intensive të gazeve serrë që çlirojnë në atmosferë", tha Duran.

Ai shtoi se emetimet e karbonit të shkaktuara nga sulmet e Izraelit që nga tetori i vitit 2023 kanë tejkaluar emetimet vjetore të qindra vendeve dhe se pasojat shtrihen përtej paqes dhe sigurisë rajonale, duke prekur klimën globale.

Politikat klimatike të Türkiyes dhe nisma "Zero Mbetje"

Duran tha se Türkiye ka miratuar një qasje gjithëpërfshirëse për luftimin e ndryshimeve klimatike, duke ratifikuar Marrëveshjen e Parisit në vitin 2021 dhe duke vendosur objektivin për emetime neto zero deri në vitin 2053 nën udhëheqjen e presidentit Recep Tayyip Erdoğan.

Ai tha se fushat prioritare përfshijnë përmirësimin e efikasitetit energjetik, zgjerimin e energjisë së rinovueshme, uljen e gjurmës së karbonit të industrisë, zhvillimin e praktikave të qëndrueshme bujqësore dhe mbrojtjen e zonave natyrore.

Ai vuri në pah nismën "Zero Mbetje", të udhëhequr nga bashkëshortja e presidentit, Emine Erdogan, duke thënë se caktimi nga Asambleja e Përgjithshme e OKB-së i 30 marsit si Dita Ndërkombëtare e "Zero Mbetje", me mbështetjen e 105 vendeve nën udhëheqjen e Türkiyes, pasqyron përpjekjet e vendit.

Duran tha se kjo nismë i ka dhënë Türkiyes një formë të veçantë të fuqisë së butë në diplomacinë klimatike, duke ndihmuar që qasja "Zero Mbetje" të shndërrohet në një normë globale. Ai theksoi nevojën që përpjekjet për klimën të mbështeten me korniza ligjore dhe paralajmëroi se komunikimi i pamjaftueshëm me publikun mund t'i bëjë ato të cenueshme ndaj dezinformimit dhe rezistencës shoqërore.

"Mendimi im personal është se zhvillimi i politikës përmes shfrytëzimit të cenueshmërive shoqërore nuk do të na çojë drejt së ardhmes", tha ai.

Duran tha se Qendra për Luftimin e Dezinformimit e Drejtorisë së Komunikimeve monitoron fushatat çorientuese për çështjet klimatike dhe tema të tjera, duke shtuar se autoritetet duhet të ndërtojnë një urë komunikimi mes legjislacionit dhe shoqërisë.

Ai u bëri thirrje mediave që të përqendrohen jo vetëm te rreziqet e ndryshimeve klimatike, por edhe te zgjidhjet, duke paralajmëruar se mesazhet negative të përsëritura mund të shtojnë ankthin e publikut dhe të çojnë në "lodhje nga gjelbërimi".

Strategji afatgjatë e komunikimit

Duran tha se ndryshimet klimatike janë çështje afatgjate që do të ndikojë te brezat e ardhshëm edhe më shumë sesa te brezi i sotëm, duke bërë thirrje për mesazhe shpresëdhënëse në të gjitha platformat e komunikimit.

Ai tha se Türkiye synon të zbatojë një strategji shumëdimensionale dhe afatgjatë të komunikimit për klimën, përfshirë edukimin mjedisor të fëmijëve sipas moshës, përmes eksperimenteve, ekskursioneve, librave dhe tregimeve.

Ai theksoi rolin e transmetuesit publik turk TRT në promovimin e ndërgjegjësimit mjedisor përmes programeve për fëmijë.

Duran përmendi projektin "Linja e Gjelbër" të Agjencisë Anadolu, të nisur në vitin 2022 për të ofruar mbulim të qasshëm të çështjeve mjedisore dhe klimatike si dhe një deklaratë të përbashkët për zjarret në pyjet e Mesdheut, të nënshkruar nga agjencitë e lajmeve të Italisë, Spanjës dhe Greqisë.

Ai tha se ndërgjegjësimi mjedisor duhet të bëhet pjesë e jetës së përditshme, përfshirë ngrohjen e banesave, transportin, zakonet e konsumit, ambalazhimin dhe menaxhimin e mbetjeve, në vend që të mbetet i kufizuar vetëm te mendimet e ekspertëve.

COP31 do të nxisë zgjidhje të përbashkëta

Duran tha se vizioni i Türkiye për COP31 bazohet në rikthimin e besimit përmes dialogut dhe shndërrimin e angazhimeve në rezultate konkrete në terren.

"Synimi ynë është të ndihmojmë që zotimet për klimën të shndërrohen në veprime të matshme dhe të qëndrueshme", tha ai duke shtuar se Türkiye synon të përshpejtojë zbatimin e angazhimeve ndërkombëtare, të forcojë bashkëpunimin mes vendeve dhe të mbështesë arritjen e rezultateve konkrete në veprimet për klimën.

Duran tha se Drejtoria e Komunikimeve po organizon vizita mediatike për çështjet mjedisore dhe klimatike, po akrediton gazetarë vendas dhe ndërkombëtarë për COP31 dhe po ndihmon në planifikimin dhe ngritjen e qendrës së medias në vendin ku do të mbahet konferenca.

"Procedurat për 1.400 nga rreth 3.000 përfaqësues të medias kanë përfunduar", tha Duran. Ai shprehu besimin se samiti, që do të organizohet nga Türkiye, do t'i bashkojë vendet me rrethana dhe prioritete të ndryshme rreth zgjidhjeve të përbashkëta ndërsa i uroi sukses konferencës.