Türkiye të shtunën hodhi poshtë pretendimet që qarkullojnë në rrjetet sociale, të cilat pretendonin kalime të paligjshme në vend nga kufiri iranian pas sulmit të përbashkët Izrael-ShBA ndaj Republikës Islamıke, duke thënë se postimet përmbajnë dezinformim.

“Pamjet janë të vjetra, nga kohë dhe vend të panjohur; është konstatuar se ato janë shpërndarë qëllimisht sërish pas zhvillimeve të fundit rajonale”, tha Qendra e Türkiyes për Luftën kundër Disinformimit në platformën sociale turke NSosyal.

Nga kjo qendër shtojnë se nuk ka prova konkrete që lidhin pamjet me kufirin e Türkiyes, duke theksuar se postimet e tilla synojnë të krijojnë një perceptim negativ te publiku duke synuar sigurinë kufitare.

“Siguria e kufirit të Türkiyes ruhet pa ndërprerje, 24 orë në 24, 7 ditë në javë, përmes sistemeve me shumë shtresa”, tha qendra.

Ajo gjithashtu bëri thirrje që pretendimeve të pabazuara të mos u jepet besueshmëri dhe që të merren parasysh vetëm deklaratat e autoriteteve zyrtare.

Izraeli dhe ShBA-ja njoftuan të shtunën herët një operacion të përbashkët kundër Iranit, duke cituar “kërcënimet” që paraqet “regjimi iranian.”

Këto sulme vijnë ndërkohë që bisedimet mes Uashingtonit dhe Teheranit mbi programin bërthamor të Iranit ishin në zhvillim nën ndërmjetësimin e Omanit. Një raund i ri bisedimesh në Gjenevë përfundoi të enjten.

Në qershorin e kaluar, ShBA-ja goditi tri objekte bërthamore iraniane gjatë luftës 12-ditore Izrael-Iran.