Raporti: Numri i të vdekurve rritet në 645 ndërsa protestat në Iran vazhdojnë
Gjithsej 10.721 persona të arrestuar deri në ditën e 16-të të protestave mbarëkombëtare në Iran, sipas të dhënave të Agjencisë së Lajmeve të Aktivistëve të të Drejtave të Njeriut me seli në ShBA.
Numri i të vdekurve nga protestat në Iran është rritur në 646, bëri të ditur të hënën Agjencia e Lajmeve të Aktivistëve të të Drejtave të Njeriut (HRANA), me seli në ShBA.
Sipas të dhënave të përpiluara nga HRANA, gjithsej 10.721 persona janë arrestuar deri në ditën e 16-të të protestave mbarëkombëtare në vend.
Në një raport, organizata thekson gjithashtu se Irani ka qenë nën një bllokadë të internetit për më shumë se 100 orë.
Irani është tronditur nga valë protestash që prej muajit të kaluar, të cilat nisën më 28 dhjetor në Pazarin e Madh të Teheranit, për shkak të zhvlerësimit të fortë të rialit iranian dhe përkeqësimit të kushteve ekonomike. Demonstratat më pas u përhapën në disa qytete të tjera.
Zyrtarët iranianë kanë akuzuar ShBA-në dhe Izraelin se qëndrojnë pas asaj që ata e përshkruajnë si “trazira të armatosura”, të cilat kanë kryer disa sulme në vende publike në mbarë vendin.
Presidenti i ShBA-së, Donald Trump, deklaroi të dielën se administrata e tij po e monitoron nga afër situatën në Iran dhe po shqyrton “opsione shumë të forta”, ndërsa numri i të vdekurve nga protestat e vazhdueshme raportohet se po rritet.
“Do të marrim një vendim,” tha Trump, duke shtuar se po merr raporte çdo orë mbi Iranin, pa dhënë informacion se kur, ku apo si do të vepronte ShBA-ja.