Libani bën thirrje për negociata të drejtpërdrejta me Izraelin nën mbikëqyrje ndërkombëtare

Presidenti i Libanit bëri thirrje për negociata të drejtpërdrejta me Izraelin nën mbikëqyrje ndërkombëtare si pjesë e një iniciative që synon vendosjen e një armëpushimi të plotë që do të ndalonte të gjitha sulmet izraelite ndaj Libanit.

Joseph Aoun gjithashtu akuzoi "një grup të armatosur jashtë shtetit" për shkaktimin e gjendjes aktuale të luftës në Liban, duke thënë se lëshimi i raketave nga territori libanez ishte "një kurth dhe një sulm i papritur" i menduar për të provokuar një përgjigje të gjerë izraelite.

Në një takim virtual me presidentin e Këshillit Evropian, Antonio Costa dhe presidenten e Komisionit Evropian, Ursula von der Leyen, Aoun tha se vendi po përballet me një situatë të rëndë humanitare, me më shumë se 600.000 libanezë të zhvendosur, "disa prej tyre në rrugë pa strehim ose edhe pa nevojat më themelore të jetës".

Sulmet ajrore izraelite kanë vrarë më shumë se 400 persona dhe kanë zhvendosur mijëra në gjithë Libanin që nga 2 marsi, mes sulmeve ndërkufitare me Hezbollahun.

Tensionet në Lindjen e Mesme janë rritur ndjeshëm që kur ShBA-ja dhe Izraeli nisën një sulm në shkallë të gjerë kundër Iranit më 28 shkurt, duke vrarë deri tani më shumë se 1.200 persona, përfshirë liderin suprem iranian Ali Khamenei dhe zyrtarë të lartë ushtarakë.

Irani është kundërpërgjigjur me sulme të gjera, duke shënjestruar baza amerikane, objekte diplomatike dhe personel ushtarak në të gjithë rajonin, si dhe disa qytete izraelite.