Türkiye po përgatitet të vendosë rregullore të reja për të mbrojtur fëmijët në platformat e rrjeteve sociale, njoftoi të dielën ministrja e Familjes dhe Shërbimeve Sociale.

Në platformën turke të rrjeteve sociale NSosyal, Mahinur Ozdemir Goktas deklaroi se qeveria është pranë vënies në zbatim të këtyre masave, duke përmendur shqetësimet në rritje për ndikimin e stimulimit të vazhdueshëm digjital tek fëmijët.

“Ashtu si shumë vende të tjera në mbarë botën, jemi shumë pranë zbatimit të rregulloreve për rrjetet sociale që synojnë mbrojtjen e fëmijëve tanë”, u shpreh ajo.

Goktas paralajmëroi se kohëzgjatja e përqendrimit te njerëzit ka rënë në rreth tetë sekonda, një prirje që, sipas saj, i dëmton fëmijët më shumë sesa të rriturit.

Ajo shtoi se përqendrimi i fëmijëve ka rënë me të paktën 30 për qind gjatë dekadës së fundit, duke ndikuar në aftësinë e tyre për t’u fokusuar, në miqësitë dhe në performancën akademike.

Këto ndryshime e kanë bërë edhe procesin e mësimdhënies më të vështirë, theksoi ajo, duke shtuar se rregulla të ngjashme për rrjetet sociale për fëmijët po diskutohen ose po zbatohen në vende të ndryshme të botës.

Ajo tha se Türkiye po punon për të krijuar një mjedis më të sigurt në internet për fëmijët, duke u bërë thirrje prindërve dhe mësuesve që ta mbështesin këtë përpjekje. “Së bashku, mund ta bëjmë të mundur një internet të sigurt për fëmijët tanë,” shtoi ajo.