Türkiye ka kërkuar përfshirjen e saj të plotë dhe pa kushte në politikën "Made in EU" të Bashkimit Evropian (BE), tha ministri i Tregtisë, Omer Bolat, pas bisedimeve me përfaqësues të industrisë evropiane të automobilistikës në Bruksel.
Bolat tha në platformën turke të mediave sociale NSosyal se u takua me Sigrid de Vries, drejtoreshë e përgjithshme e Shoqatës së Prodhuesve Evropianë të Automobilëve (ACEA), për të diskutuar politikën dhe efektet e saj të mundshme në ekosistemin automobilistik Türkiye-BE.
Ai gjithashtu mori pjesë në një takim të tryezës së rrumbullakët me përfaqësues të kompanive anëtare të shoqatës.
Gjatë takimit, pala turke theksoi se investimet e bëra nga prodhuesit evropianë të automobilëve që operojnë në Türkiye prej shumë vitesh përbëjnë një tregues konkret të integrimit të thellë industrial të krijuar përmes Bashkimit Doganor Türkiye-BE dhe një partneriteti të bazuar në besim të ndërsjellë.
Bolat tha se përfaqësuesit e industrisë automobilistike ranë dakord për nevojën që Türkiye të përfshihet plotësisht dhe pa kushte në kuadrin "Made in EU".
"U kënaqëm kur pamë konsensus mes përfaqësuesve të sektorit të automobilëve për përfshirjen e plotë dhe pa kushte të Türkiyes në politikën 'Made in EU'", tha ai.
Bolat shtoi se Türkiye do t’i vazhdojë nismat e saj, me mbështetjen e sektorit privat, për ta forcuar dhe për ta zhvilluar më tej industrinë automobilistike, të cilën e përshkroi si një gur themeli të integrimit tregtar të vendit me BE-në.
Industria automobilistike e Türkiyes mbeti sektori kryesor eksportues i vendit në vitin 2025, me shitjet jashtë vendit që u rritën me 11,6 për qind në një rekord prej 41,5 miliardë dollarësh, sipas Shoqatës së Eksportuesve të Industrisë Automobilistike.
Eksportet drejt vendeve të BE-së arritën në 30,11 miliardë dollarë, duke përbërë 72,5 për qind të eksporteve të përgjithshme të sektorit dhe duke nënvizuar integrimin e tij me tregun evropian.
Türkiye prodhoi pothuajse 1,42 milion automjete motorike në vitin 2025, përfshirë rreth 872.500 vetura, sipas Shoqatës së Prodhuesve të Automobilëve.
Eksportet e veturave të pasagjerëve arritën në pothuajse 599.700 njësi gjatë vitit.
